Аўтар праекта Signal Алег Ларычаў распавёў, што на яго напалі невядомыя у пад’ездзе яго дома.
У Алега сінякі пад вачыма, вельмі баліць сківіца — ён размаўляе з цяжкасцю; разбітыя вусны. Таксама моцна кружыцца галава, раскрышаны зуб. Ён губляў прытомнасць пасля збіцця.
Хто напаў на яго — невядома. Сам Ларычаў паведамляе, што гэта былі двое ў цывільным. Ані тэлефон, ані грошы ў яго не забралі.
«Я выйшаў у краму. Вяртаўся, ля пад’езда стаяў мужчына, калупаўся ў дамафоне. Я набраў свой нумар кватэры, ён таксама ўвайшоў, на лесвіцы абагнаў мяне. Пасля хтосьці ззаду ударыў, той, што быў спераду — таксама далучыўся. У першую чаргу той, хто біў ззаду, выбіў мабільнік з маіх рук. Збілі з ног, білі па галаве. Пытаўся — за што? Нічога не казалі. На некаторы час я згубіў прытомнасць. Ачуняў — няма нікога. Тэлефон валяецца побач, нічога не забралі, — распавёў «Нашай Ніве» Алег Ларычаў. — Я апісаў таго хлопца міліцыі. Думаю, змагу апазнаць яго аднаго»
Пасля збіцця Ларычаў падняўся ў сваю кватэру, выклікаў хуткую. Хуткая выклікала міліцыю. Алега адвезлі ў бальніцу хуткай медыцынскай дапамогі на абследаванне. Дыягнаставалі закрытую чэрапна-мазгавую траўму.
У прыёмным пакоі бальніцы ён адразу напісаў заяву.
Адметна, што 1 красавіка Ларычаў праз сваю суполку Signal Project, што піша пра стрыт-арт і графіці, паведаміў пра збор грошай мастакамі, якія робяць вядомы сацыяльны стрыт-арт. Менавіта яны вывешвалі на вуліцы Мінска выявы Шчоткінай, Шуневіча, «маленькіх Мясніковічаў». Ларычаў вельмі падрабязна асвятляў гэтыя акцыі.
«Я думаю, з гэтым звязана збіццё. Калі б былі хуліганы — то штосьці б забралі. Больш няма прычын.
Мне няма чаго прад’явіць фармальна. З суседзямі канфліктаў няма. Закон я не парушаю, — сказаў Ларычаў.
— Міліцыянт, які браў заяву, сказаў — беспрэдзел, людзей збіваюць.
Калі мясцовыя, то можна будзе знайсці. Але я лічу, што наўрад ці каго яны знойдуць».
Цяпер чытаюць
Максім Знак пра прэс-канферэнцыю ва Украіне: Мы дамовіліся не ўздымаць найбольш балючыя тэмы — катаванняў, санкцый, вайны. Можа, мусілі мы па-іншаму зрабіць88
Каментары