Пасольства Беларусі ва Украіне выказала пратэст у сувязі з хуліганскімі дзеяннямі ля будынка дыпмісіі ў Кіеве. Пра гэта гаворыцца ў заяве на сайце пасольства.
У дыппрадстаўніцтве распавялі, што 23 верасня група неўстаноўленых людзей перад будынкам пасольства Беларусі правяла хуліганскую акцыю антыбеларускай скіраванасці.
«Беручы пад увагу, што ўдзельнікі акцыі хавалі твары, паводзілі сябе нахабна і агрэсіўна, выкарыстоўвалі фаеры, пасольства Беларусі ва Украіне выказала пратэст украінскаму боку і запатрабавала правесці адпаведнае расследаванне», — гаворыцца ў заяве.
Акрамя таго, пасольства патрабуе гарантаваць бяспеку функцыянавання беларускай дыпламатычнай місіі ў адпаведнасці са арт. 22 Венскай канвенцыі аб дыпламатычных зносінах ад 18 красавіка 1961 года.
Ва ўкраінскіх СМІ і адкрытых крыніцах не згадваецца аб правядзенні якой-небудзь акцыі ля беларускай дыпмісіі 23 верасня.
