У Кіеве праходзіць маштабная выстава беларускіх тавараў «Made in Belarus»
З 10 па 14 красавіка ў кіеўскім «Міжнародным выставачным цэнтры» праходзіць выстава «Made in Belarus», на якой беларускія вытворцы прадстаўляюць украінскаму бізнэсу тавары і распрацоўкі ў сферах машынабудавання, нафтахіміі, транспарту, сельскай гаспадаркі, харчавання, лёгкай прамысловасці.
Удзел у выставе бяруць удзел «БелАЗ», «Амкадор», «МАЗ», «МТЗ», «Гомсельмаш», «Беларускі металургічны завод», «Магілёўліфтмаш».
«Брэстгазаапарат» паказвае новыя пліты гандлёвай маркі «Gefest».
«Гомельшкло» прапануе шырокі асартымент шкляной прадукцыі: бясколернае і празрыстае ліставае шкло вялікага фармату, ламінаванае (трыплекс), энергазберагальнае і загартаванае шкло.
Нафтахімічную прадукцыю прэзентуюць прадпрыемствы канцэрна «Белнафтахім».
«Белшына» прывезла легкавыя і грузавыя шыны.
Прадпрыемства «Белтранснет» презентуе сістэму SkyWay, асаблівасцю якой з’яўляецца рух транспартнага сродка на монарэльсе, пракладзеным на пэўнай вышыні над горадам, а хуткасць пры гэтым можа дасягаць 500 км/г.
Вырабы медыцынскага прызначэння прапануюць кампаніі «ГалтэяФарм» і «МІЗ Медбелрос»: пальчаткі, бінты, скальпелі, стэтаскопы, лячэбныя пластыры-павязкі, стаматалагічныя інструменты.
Шырокі асартымент дэкаратыўнай касметыкі, а таксама шэраг прафесійных сродкаў для салонаў прыгажосці дэманструюць найбуйнейшыя касметычныя прадпрыемствы Беларусі — «Беліта» і «Вітэкс».
Вырабы з лёну і трыкатажу прывезлі швейныя фабрыкі «8 сакавіка» і «Аршанскі льнокамбінат». Гэта мужчынскія і жаночыя мадэлі штодзённага адзення, адзенне для дзяцей, тэкстыль. Шырокі асартымент панчох і шкарпэтак прапануе кампанія «Контэ Спа».
Новую лінейку жаночых і мужчынскіх сумак, заплечнікаў, партфеляў, валізак, партманэ з натуральнай скуры і штучных матэрыялаў дэманструе «Галантэя».
Таксама на выставе «Made in Belarus» у Кіеве прадстаўлены беларускія вытворцы прадуктаў і напояў. У мерапрыемстве бяруць удзел «Дзятлаўскі сыраробны завод», «Шчучынскі масласырзавод», «Слуцкі камбінат хлебапрадуктаў». Беларускія кампаніі прывезлі сыры, масла, муку і паўфабрыкаты, кашы і шматкі.
Нават віны і каньякі прывезлі беларусы — «Мінскі завод вінаградных він».
Наведвальнікаў на выстаўцы не так і многа, але беларускія вытворцы не бядуюць з гэтай нагоды, кажуць, што для такой выстаўкі больш важная не колькасць, а якасць наведвальнікаў: дастаткова двух-трох сур’ёзных партнёраў, каб прыезд на выстаўку апраўдаўся, выліўшыся ў новыя заказы і продажы.
Усе беларускія ўдзельнікі падкрэсліваюць, што беларуска-ўкраінскія гандлёвыя сувязі з году ў год растуць і павялічваюцца. Цікава, што ў выстаўцы бяруць удзел і ўкраінскія банкі, якія прапануюць украінскаму бізнэсу крэдыты для набыцця беларускіх тавараў.
Каментары