Суд у Маскве павялічыў тэрмін затрымання беларускай грамадзянкі Насці Рыбкі на тры дні
Нагацінскі суд Масквы павялічыў на трое сутак тэрмін затрымання беларускай грамадзянкі, скандальнай эскортніцы Насці Рыбкі (Анастасіі Вашукевіч). Пра гэта паведаміла з залы суда расійская служба Радыё Свабода. Судовае пасяджэнне аб абранні меры стрымання для Рыбкі адкладзена на 22 студзеня.
Рыбку падазраюць ва ўцягванні ў прастытуцыю. Ёй пагражае пазбаўленне волі на тэрмін да шасці гадоў.
Рыбка была затрыманыя ў маскоўскім аэрапорце Шарамеццева ў чацвер пасля дэпартацыі з Тайланда, дзе яе прысудзілі да ўмоўнага тэрміну за арганізацыю сэкс-трэнінгаў. Яна павінна была быць дэпартаваная ў Беларусь, але яе затрымалі ў транзітнай зоне аэрапорта.
У 2018 годзе Насця Рыбка стала гераіняй расследавання Аляксея Навальнага пра віцэ-прэм'ера Сяргея Прыходзьку і бізнэсмена Алега Дзерыпаску. Навальны сцвярджаў, што чыноўнік правёў тры дні на яхце Дзерыпаскі ля берагоў Нарвегіі разам з дзяўчатамі з эскорт-агенцтваў. Расследаванне Навальнага грунтавалася на кнізе і інстаграме Рыбкі. Навальны абвінаваціў Прыходзьку ў карупцыі. Калі Рыбка была на яхце, Дзерыпаска абмяркоўваў з расійскім чыноўнікам ўмяшальніцтва ў выбары прэзідэнта ЗША, сцвярджала яна.
У судзе Насця Рыбка выбачылася перад Дзерыпаскам, адзначае Радыё Свабода.
Каментары