П'яны пасажыр познім вечарам 15 лютага «заклаў» бомбу на станцыі метро «Малінаўка», паведаміў БелТА афіцыйны прадстаўнік МУС Аляксандр Марчанка.
Паведамленне пра бомбу ў метро паступіла на спецлінію 102 пасля 23.20. На месца здарэння неадкладна накіраваліся супрацоўнікі міліцыі і вайскоўцы сапёрна-піратэхнічнай групы в/ч 5448. Высветлілася, што на станцыі «Малінаўка» п'яны 34-гадовы мінчук адмовіўся пакідаць вагон і пасварыўся з-за гэтага з дзяжурнай па прыёме і адпраўлення цягнікоў.
«У ходзе канфлікту пасажыр сцвярджаў, што заклаў бомбу ў метро, а супрацоўнікам службы бяспекі заявіў аб наяўнасці выбуховага прыстасавання ў заплечніку. Пры аглядзе тэрыторыі метрапалітэна і асабістых рэчаў затрыманага ніякіх забароненых прадметаў, уключаючы зброю, боепрыпасы і выбуховыя рэчывы, не выяўлена», - праінфармаваў Аляксандр Марчанка.
Мужчыну змясцілі ў ІЧУ. У яго крыві знайшлі 1,72 праміле алкаголю.
Каментары