Маладафронтавец сцвярджае, што яго спрабавалі завербаваць супрацоўнікі КДБ
21-гадовы маладафронтавец Іван Мірончык кажа, што да яго на працу 27 сакавіка прыйшлі два супрацоўнікі КДБ і прапанавалі паваланцёрыць на Еўрапейскіх гульнях, але хлопец адмовіўся. Пасля гэтага пачаліся пытанні ўжо зусім іншай накіраванасці.
У прыватнасці, у Мірончыка пыталіся пра дзейнасць «Маладога фронта», а таксама яго кіраўніка Дзяніса Урбановіча. «Пыталіся, якія акцыі ён плануе, што гэта ўвогуле за чалавек», — кажа Мірончык.
«Я спытаўся, ці можна гэта лічыць вярбоўкай, мне адказалі, калі хочаце, то так», — запэўнівае маладафронтавец.
Адзін з супрацоўнікаў КДБ прадставіўся «Міхаілам Васільевічам», другі сваё імя не называў.
Іван Мірончык працуе зборшчыкам на заводзе МТЗ. Кажа, што размова адбывалася ў кабінеце ягонага начальніка, але сам начальнік пры ёй не прысутнічаў. Праблем на працы ў хлопца праз гэты візіт яшчэ не ўзнікла.
Агулам размова доўжылася амаль тры гадзіны. У выніку Іван падпісаў паперу, што адмаўляецца валанцёрыць на Еўрапейскіх гульнях, а таксама што не прытрымліваецца экстрэмісцкіх поглядаў.
Іван Мірончык — актыўны ўдзельнік вахты памяці ў Курапатах.
Цяпер чытаюць
На перадсмяротным відэа з калоніі насамрэч быў не Вітольд Ашурак. З'явіліся новыя падрабязнасці смерці палітвязня28
Каментары