Прэзідэнт ЗША сцвярджае, што Ізраіль і Іран звярнуліся да яго «амаль адначасова» з гатоўнасцю да міру.
«Ізраіль і Іран прыйшлі да мяне амаль адначасова і сказалі: «Мір». Я ведаў, што час прыйшоў», — напісаў ён у сваёй сацсетцы Truth Social.
Паводле яго слоў, абедзве краіны чакаюць «любоў, мір і росквіт» у будучыні.
«Яны могуць шмат набыць, але таксама шмат страціць, калі сыйдуць з праведнага і сапраўднага шляху», — дадаў амерыканскі прэзідэнт.
У заяве Трампа гаварылася, што перамір’е пачнецца праз некалькі гадзін (прыкладна а 7-й раніцы па Мінску).
Высокапастаўлены прадстаўнік амерыканскай адміністрацыі сказаў тэлевізійнай кампаніі CBS, партнёру Бі-бі-сі ў ЗША, што Ізраіль і Іран пагадзіліся на спыненне агню, аднак ніводны з бакоў пакуль не выступіў з афіцыйнай заявай.
Трамп напрамую звязаўся з прэм’ер-міністрам Ізраіля Біньямінам Нетаньяху, і той пагадзіўся на перамір’е пры ўмове, што Іран не будзе працягваць атакі, паведамляе CBS.
Паводле звестак суразмоўцы тэлевізійнай кампаніі, пагадненне аб перамір’і было дасягнута пасля таго, як віцэ-прэзідэнт ЗША Джэй Дзі Вэнс, дзяржсакратар Марка Рубіа і спецпасланнік Стыў Уіткаф звязаліся з Тэгеранам праз прамыя і ўскосныя каналы.
Тэгеран першапачаткова не даў афіцыйнага адказу на заяву Трампа аб спыненні агню.
Іранскія СМІ, у тым ліку дзяржаўныя, у сваіх паведамленнях назвалі гэта «заявай» Трампа — пакуль ухіляючыся ад прамога прызнання.
Міністр замежных спраў Ірана Абас Арагчы заявіў, што на дадзены момант няма ніякага пагаднення аб спыненні агню з Ізраілем, але калі ізраільскі бок спыніць атакі, то Тэгеран таксама гатовы спыніць абстрэлы.
«На дадзены момант НЕ ІСНУЕ ніякага «пагаднення» аб спыненні агню або баявых дзеянняў. Аднак, калі ізраільскі рэжым спыніць сваю незаконную агрэсію супраць іранскага народа не пазней за 4-ю раніцы па тэгеранскім часе, мы не маем намеру працягваць нашы адказныя дзеянні пасля гэтага», — напісаў Арагчы ў сацсетцы X.
Паводле яго слоў, канчатковае рашэнне аб спыненні баявых дзеянняў будзе прынята пазней.
Ізраільская армія, у сваю чаргу, паведамляе пра некалькі запускаў ракет з Ірана.
Паводле звестак ЦАХАЛ, «сістэмы супрацьпаветранай абароны працуюць, каб перахапіць пагрозу».
Цяпер чытаюць
Ціханоўская: Перамены ў Беларусі — гэта пытанне часу. Вось асноўныя тэзісы яе выступу на канферэнцыі «Новая Беларусь»26
Ціханоўская: Перамены ў Беларусі — гэта пытанне часу. Вось асноўныя тэзісы яе выступу на канферэнцыі «Новая Беларусь»
DDoS-атака ідзе на сайты адразу некалькіх беларускіх СМІ. Магчыма, яна звязаная з шостай гадавінай народнага ўздыму 2020‑га і канферэнцыяй «Новая Беларусь», што адкрылася сёння66
Каментары