У цэнтры Кіева пры абстрэле Range Rover забілі трохгадовага сына дэпутата
Здарэнне адбылося ў нядзелю, 1 снежня, ля рэстарана «Марыа» на скрыжаванні вуліц Льва Талстога і Тарасаўскай. Дзіця памерла ў карэце хуткай дапамогі па дарозе ў дзіцячую бальніцу, піша kp.ua.
Дзяўчына па імені Івана распавяла журналістам, што бачыла, як каржакаваты мужчына ў чорным сядаў у легкавую машыну ля рэстарана. Пасля гэтага кіроўца ўседарожніка, дэпутат Вячаслаў Собалеў, выбег на вуліцу з дзіцем на руках.
— Бацька выбег з машыны з дзіцем на руках. Дзіця крычала, што яму балюча, бацька крычаў: «Выклікайце хуткую».
Потым яны пабеглі да «Марыа», маці крычала, прыехала хуткая. Я не бачыла моманту стрэлу, я бачыла толькі як чалавек сеў у машыну і яна ад'ехала, — распавяла дзяўчына.
Сведка адзначыла, што мужчына быў не ў масцы. Зброі, як і моманту стрэлу, дзяўчына не бачыла
Cтралялі па бакавым пярэднім шкле уседарожніка. Стралялі ў машыну 47-гадовага бізнэсоўца і дэпутата Кіеўскага абласнога савета ад Блока Пятра Парашэнкі Вячаслава Собалева. Яму і належыць рэстаран «Марыа».
Собалеў — ураджэнец Енакіева Данецкай вобласці. У 1997 годзе адкрыў першы магазін «Абжора», а пасля арганізаваў аднайменную гандлёвую сетку. Собалеў — бацька пяцярых дзяцей, у 2016 годзе ў іх з жонкай Інай нарадзіўся малодшы сын.
Собалева абвінавачвалі ў тым, што сетка «Абжора» працуе на тэрыторыі так званых «ЛДНР», аднак дэпутат заявіў, што прадаў яе яшчэ ў 2007 годзе. Таксама ён адмаўляў наяўнасць расійскага пашпарта.
Што вядома пра сям'ю з Баранавічаў, у якой і мужу, і жонцы далі велізарныя тэрміны за «здраду дзяржаве»4
Каментары