Газета Ушацкага раёна інфармавала пра 53 выпадкі пнеўманіі, але пасля выдаліла гэта з сайта
Стала вядома аб 13 заражаных каранавірусам у Лёзненскім раёне, ён стаў 14-м рэгіёнам Віцебшчыны, дзе паведамілі аб наяўнасці COVID-19. Ва Ушацкім раёне колькасць хворых з пнеўманіяй пераваліла за паўсотню, паведамляюць Народныя навіны Віцебска.
Прычым адбылося гэта вельмі незвычайна — пра факты захворвання на каранавірусную інфекцыю на Лёзненшчыне напісала «Беларусь Сегодня», а мясцовая раённая газета толькі праз некаторы час перадрукавала інфармацыю з цэнтральнага СМІ.
Несуцяшальная інфармацыя паступіла з Паставаў, там за суткі колькасць хворых COVID-19 па інфармацыі газеты «Пастаўскі край» павялічылася больш чым у тры разы — з 4 да 13 пацыентаў. Адзін чалавек падключаны да апарата штучнай вентыляцыі лёгкіх.
У Глыбоцкім раёне ўжо два чалавекі, якія заразіліся каранавіруснай інфекцый. Аб студэнце, якога адправілі дадому з Віцебска, ужо пісалі. Таксама каранавірус выявілі ў жанчыны, якая выязджала за межы раёна і вярнулася дадому. Такім чынам, абодва выпадку тут завозныя, піша газета «Веснік Глыбоччыны».
Выданне Ушацкага раёна «Патрыёт» 16 красавіка паведаміла пра тое, у стацыянары Ушацкай райбальніцы праходзяць лячэнне сем чалавек, у якіх лабараторна пацверджаны факт заражэння каранавірусам, пры гэтым 14 красавіка там было восем такіх хворых. Магчыма, першы хворы ўжо выпісаны, але дакладнай інфармацыі няма. Акрамя таго, 53 пацыенты ва Ушацкім раёне хварэюць на пнеўманію. Да апаратаў штучнай вентыляцыі лёгкіх падключаны двое хворых. У раёне выявілі 81 кантакт першага ўзроўню, іх абследавалі і ўзялі пад медыцынскае назіранне. На жаль, такая падрабязная інфармацыя пазней была выдаленая з сайта газеты і захавалася толькі ў агрэгатары RSS.
У цэлым у Віцебскай вобласці на 16 красавіка было зафіксавана 1092 выпадкі інфіцыравання каранавірусам.
Цяпер чытаюць
Белпол: «Эпштэйн не даехаў да Беларусі». А кім былі бацькі яго каханкі Карыны Шуляк?3
Каментары