42‑гадовая дачка Брыжыт Макрон завяла раман з 22‑гадовым хлопцам
Дачка першай лэдзі Францыі Тыфэн Аз’ер паказала свайго новага каханага. Ён маладзейшы за яе на 20 гадоў. Амаль такая ж розніца ў гадах і ў яе маці Брыжыт з Эмануэлем Макронам.
Пра новыя адносіны 42‑гадовай Тыфэн Аз’ер (Tiphaine Auzière), малодшай дачкі Брыжыт Макрон ад першага шлюбу, піша Le Parisien. Яе абраннікам стаў 22‑гадовы студэнт бізнэс-школы Антуан Лёконт (Antoine Lecomte).
Гісторыя прыцягнула ўвагу праз паралель з асабістым жыццём маці Аз’ер. Брыжыт Макрон старэйшая за свайго мужа, прэзідэнта Францыі Эмануэля Макрона, на 24 гады. У выпадку яе дачкі розніца таксама вялікая: Тыфэн на 20 гадоў старэйшая за свайго каханага.
У канцы жніўня падчарка Эмануэля Макрона падзялілася ў сацсетках кадрамі з паездкі ў Амстэрдам разам з Антуанам Лёконтам. Малады чалавек таксама апублікаваў фота і відэа, на якіх яны разам.
Паводле інфармацыі часопіса Gala, пазнаёміліся яны падчас адпачынку ў Лё-Туке — французскім курортным горадзе, дзе ў сям’і Макронаў ёсць дом.
Знаёмы пары правёў паралель паміж Тыфэн і яе маці яшчэ больш непасрэдна: «Як і Брыжыт, яна слухае толькі сваё сэрца і не звяртае ўвагі на тое, што думаюць іншыя».
Антуан Лёконт родам з Ліля, вучыцца ў французскай бізнэс-школе NEOMA і захапляецца кайтсёрфінгам. Ён таксама стварыў брэнд Mission Kiteboarding, які займаецца рыштункам для гэтага віду спорту.
Тыфэн Аз’ер працуе адвакаткай, мае ўласную юрыдычную фірму ў Парыжы, а ў 2024 годзе яшчэ і выдала свой першы раман Assises («Суд прысяжных»).
Паводле інфармацыі французскіх медыя, адным з супольных інтарэсаў пары стала прадпрымальніцтва. Аз’ер і Лёконт абмяркоўваюць сумесныя прафесійныя праекты, а адвакатка, як сцвярджаецца, збіраецца суправаджаць яго ў Азію, дзе малады чалавек развівае свой бізнэс.
Цяпер чытаюць
«З расіян-наведнікаў працэнтаў 70 аказваліся ватнікамі». Экс-гід з музея ВАВ, якога затрымлівалі яго ж экскурсанты, цяпер папулярны ў Варшаве — пагутарылі з ім14
Каментары