Польшча пасля двух месяцаў вельмі строгага каранціну адкрывае цырульні, рэстараны і школы
Прэм'ер Матэуш Маравецкі і міністр аховы здароўя Лукаш Шумоўскі на прэс-канферэнцыі паведамілі, што з 18 мая могуць быць адкрыты цырульні і касметычныя салоны пры ўмове захавання неабходных санітарных нормаў, паведамляе Радыё Польшча.
Кліенты павінны запісвацца праз інтэрнет ці тэлефон, а ў цырульнях і салонах павінны пазбягаць чэргаў і трымаць сацыяльную дыстанцыю.
У гэты ж час «зялёнае святло» будзе дадзена гастранамічным установам, таксама з выкананнем мер засцярогі, — сказаў прэм'ер:
«Часткова адкрываем таксама гастранамічныя паслугі — рэстараны, бары, пункты грамадскага харчавання, кафэ, але з захаваннем санітарнага рэжыму ў памяшканнях, а таксама звонку. Мы нават просім уладальнікаў выстаўляць столікі на вуліцу, бо, як кажуць эпідэміёлагі, на свежым паветры значна бяспечней», — сказаў Маравецкі.
З 18 мая могуць аднавіцца практычныя заняткі ў тэхнікумах і прафшколах. Таксама будзе зніжаны ліміт у дачыненні да колькасці пасажыраў у грамадскім транспарце.
З 25 мая ў школу змогуць вярнуцца вучні малодшых класаў (з 1-га па 3-і).
Вучні 8-х класаў і выпускнікі атрымаюць магчымасць асабістых кансультацый з настаўнікамі, каб падрыхтавацца да іспытаў. А з 1 чэрвеня кансультацыі будуць даступныя для ўсіх школьнікаў.
Польшча ўвяла ў сярэдзіне сакавіка вельмі строгі каранцін, закрыўшы ўсё што можна і ўвёўшы масачны рэжым.
Па стане на 13 мая ў краіне 17 062 выпадкі каранавіруса (памерлі 847 чалавек). Колькасць выпадкаў захворвання на 1 млн складае 451 чалавек, тады як у Беларусі 2733 на 1 млн.
Цяпер чытаюць
«Жэня пагадзіўся на будоўлю, а не ваяваць. І толькі калі выйдзе з запою!»: як прадалі ў расійскую армію жыхара Лёзна. Ахвяра не адна6
Каментары