Каб вывезці карціны Шагала і Суціна з Беларусі, патрэбны спецыяльны дазвол Мінкульта. А Міністэрства яго не давала

Старшыня Белтэлерадыёкампаніі Іван Эйсмант 14 чэрвеня паведаміў у выніковым выпуску навінаў, што паўтары сотні карцін агульным коштам каля 20 млн даляраў з калекцыі Белгазпрамбанка «далучаны да справы». На кадрах аператыўнай здымкі можна ўбачыць работы мастакоў з сусветным імем — Шагала, Суціна, Бакста, Царфіна, Любіча і іншых. Як стала вядома TUT.BY, карціны па-ранейшаму знаходзяцца ў галерэі «Арт-Беларусь» у Палацы мастацтваў, аднак для гледачоў уваход пакуль зачынены.

У сюжэце, прысвечаным справе Белгазпрамбанка, Эйсмант распавёў пра ператрусы ў банку і іншых камерцыйных структурах, у ходзе якіх, па яго словах, «было канфіскавана каля чатырох мільёнаў даляраў, атрыманых, як лічыць следства, незаконным шляхам, каштоўныя паперы коштам 500 тысяч даляраў, золата, аблігацыі, дыгіпасы і многае іншае».

— Звярніце ўвагу на наступнае відэа, яго яшчэ не было ў эфіры. Паўтары сотні карцін агульным коштам 20 млн даляраў таксама далучаны да справы, — заявіў у эфіры вядучы. — Ёсць інфармацыя, што іх рыхтавалі да тэрміновага вывазу з краіны. Зрэшты, сапраўдны кошт дадзеных актываў можа быць вышэйшы, можна толькі ўявіць, за колькі яны маглі быць прададзеныя на аўкцыёнах.

Ператрус у офісе Белгазпрамбанка прайшоў 11 чэрвеня, галерэя «Арт-Беларусь», дзе захоўваюцца карціны карпаратыўнай калекцыі банка, працавала да 12 чэрвеня. З 13 чэрвеня на ўваходзе вісіць абвестка, што галерэя не працуе па тэхнічных прычынах. Супрацоўнікі, просячы прабачэння, адмаўляюцца ад каментароў, адзначаюць толькі, што на дадзены момант стан карцін і спосаб іх захоўвання трывогі не выклікае.

Як стала вядома TUT.BY, карціны, якія «далучаны да справы», пакуль знаходзяцца ў сховішчы галерэі. За фармулёўкай «далучаны да справы» можа хавацца альбо тое, што карціны з'яўляюцца рэчавым доказам па справе, альбо яны арыштаваныя для забеспячэння ў наступным пазову на пагашэнне шкоды.

Паколькі гаворка ідзе пра карціны, важна выконваць усе патрабаванні па іх захаванні, малыя парушэнні тэмпературнага рэжыму могуць прывесці да псавання. Згодна з законам арыштаваная маёмасць можа быць перададзена на захоўванне ўласніку або іншай асобе, які абавязваецца забяспечыць яго захаванасць на час разбіральніцтва па справе.

Што тычыцца тэрміновага вывазу карцін за мяжу, як прагучала ў эфіры БТ, каб вывезці прадмет мастацтва, трэба загадзя атрымаць дазвол ад Міністэрства культуры, інакш мытня проста не дасць дабро. Па звестках TUT.BY, за апошнія месяцы Мінкульт не выдаваў уласніку такіх дазволаў.

Як афармляецца дазвол? Заяўнік разам з наборам дакументаў, у тым ліку аплочанай дзяржпошлінай, і прадметам мастацтва прыходзіць у Мінкульт, дзе эксперты разглядаюць заяву (у якой прапісваецца мэта вывазу) і вырашаюць, ці выдаць дазвол. Сыходзіць на гэта да дзесяці дзён.

У калекцыі Белгазпрамбанка больш за 30 карцін з'яўляюцца гісторыка-культурнай каштоўнасцю. Згодна з законам такія аб'екты можна вывозіць за мяжу толькі на час, уладальнік (усё роўна, прыватная кампанія, прыватная асоба або дзяржаўная арганізацыя) прад'яўляе ў Міністэрства культуры патрэбныя дакументы — дамову з замежным музеем, напрыклад, сведчанне пра страхоўку, таксама прапісваецца мэта вывазу, тэрміны вывазу і вяртання.

Яшчэ адзін важны момант — перавозка карцін. Можна выкарыстоўваць толькі спецыяльны транспарт, які забяспечвае амартызацыю, каб карціны не пашкодзіліся ў шляху ад вібрацыі, а таксама неабходны тэмпературны рэжым, то-бок патрэбна машына з пнеўмападвескай і тэрмазахоўваннем.

Карціны пакуюцца ў спецыяльныя вялікія скрыні, улічваючы памер работ. Гэта значыць проста пакласці карціну сабе ў машыну і вывезці ў любым кірунку немагчыма, нават калі яна, як у выпадку з калекцыяй Белгазпрамбанка, належыць прыватнай кампаніі.

Аператыўная здымка, паказаная на БТ, не зафіксавала грузавыя фуры для вывазу карцін з Беларусі, а таксама дазвольныя дакументы з Міністэрства культуры. Атрымаць аператыўны каментар аб лёсе «далучэння да справы» карцін у Камітэце дзяржкантролю не ўдалося.

• 0
• 0
• 0
• 0
• 0
• 0
• 0
• 0