Памятаеце дзіўны адказ з Адміністрацыі прэзідэнта? Атрымальніца пераконвае, што насамрэч дасылала кампліменты Лукашэнку
Тыдзень таму «Наша Ніва» апублікавала дзіўны ліст, які прыйшоў мінчанцы Наталлі Мухамад з Адміністрацыі прэзідэнта ў адказ на зварот. Гэты дакумент быў апублікаваны ў закрытым юрыдычным чаце. Яго ўдзельнікі даслалі той адказ у Рэдакцыю.
Чытайце: Грамадзяне напісалі скаргу ў Адміністрацыю прэзідэнта — і атрымалі вельмі дзіўны адказ ФОТАФАКТ
Сяброўка Наталлі, якая і апублікавала адказ, расказала карэспандэнту «Нашай Нівы», што бачыла дакумент на ўласныя вочы. І патлумачыла, што сям'я Наталлі дасылала скаргу на несправядлівы прысуд. Але паколькі ўсё яшчэ спадзяецца на станоўчае вырашэнне свайго пытання, не хоча публічна каментаваць сітуацыю.
Да таго ж муж Наталлі не мае беларускага грамадзянства, знаходзіцца з дазволам на жыхарства і баіцца яго страціць.
Таму Наталля Мухамад камунікавала з карэспандэнтам «Нашай Нівы» толькі праз сяброўку. У выніку Рэдакцыя апублікавала той самы адказ з Адміністрацыі прэзідэнта, замазаўшы персанальныя звесткі заяўніцы.
Праз тыдзень адбылося нешта дзіўнае: Наталля Мухамад сама выйшла на сувязь з Рэдакцыяй. Яна папрасіла нікуды «не ўблытваць» яе і запэўніла, што насамрэч пісала не скаргу, а падзяку.
«Добры вечар. Паважаны Аляксандр Рыгоравіч, хачу выказаць вам вялізную ўдзячнасць за ўсё, што вы зрабілі для народа! Хачу пажадаць вам цярпення і сілаў! Аляксандр Рыгоравіч, уся наша сям'я і вельмі вялікая колькасць людзей за вас! Хачу, каб вы ведалі, мы хочам, каб прэзідэнтам былі вы!» — напісана на паперы, якую Наталля даслала ў Рэдакцыю.
Яна папрасіла апублікаваць і тэкст звароту, і яе звесткі. А таксама патлумачыла, чаму вырашыла напісаць такі змястоўны ліст у Адміністрацыю прэзідэнта.
«[Лукашэнка] даў кватэру, ёсць бясплатная адукацыя і медыцына. Я не магу выказаць сваё меркаванне? Я жыву ў краіне без вайны! І за гэта ўдзячна!» — сказала Наталля.
Цяпер чытаюць
ЗША перадалі Лукашэнку найноўшыя амерыканскія лекі для пахудзення15
Каментары