Літва просіць Беларусь даць афіцыйную інфармацыю пра інцыдэнт, які адбыўся на беларускай атамнай станцыі ў Астраўцы 8 лістапада. МЗС Літвы ўручыла Мінску ноту з адпаведным запытам, паведамляе «Інтэрфакс».
Там адзначылі, што запыталі інфармацыю пра інцыдэнт, ягоныя прычыны і ўплыў на працэс запуску станцыі і атамную бяспеку.
«Літве і ўсёй міжнароднай грамадскасці важна кіравацца афіцыйнай інфармацыяй аб сітуацыі на АЭС, заснаванай на фактах», — дадалі ў прэс-службе замежнага ведамства.
Раней беларускія СМІ паведамлялі, што ў нядзелю, 8 лістапада, турбіна першага энергаблока БелАЭС была спыненая з-за выхаду з ладу трансфарматараў напружання на адным з агрэгатаў.
BNS у панядзелак, 9 лістапада, са спасылкай на Літоўскага аператара сістэмы ліній электраперадачы (ЛЭП) Litgrid паведаміла, што з поўдня нядзелі БелАЭС перастала выпрацоўваць электраэнергію.
Каментары