66-гадовую Галіну Гулянкову, якая чытала беларускія кніжкі ў электрычцы разам зь іншымі пэнсіянэрамі, Партызанскі суд Менску арыштаваў на 20 сутак. Цяпер яна ў ЦІП на Акрэсьціна, піша «Радыё Свабода».
Зьвінавацілі жанчыну ва ўдзеле ў масавай акцыі па ч. 3. арт. 23.34 і непадпарадкаваньні супрацоўнікам міліцыі па артыкуле 23.4.
Галіна Гулянкова не прызнала сябе вінаватай. Па словах сына, яна заявіла, што ехала на рынак у Ждановічы, у яе была з сабой кніга Васіля Быкава. Калі яна выйшла з электрычкі, на пэроне да яе падышоў мужчына ў адзеньні рыбака, які трымаў ледабур.
«Ён схапіў маму за руку і сказаў: «Пройдзем». Мама разгубілася і пайшла за ім. Мужчына аказаўся ўчастковым, ён завёў маму ў аўтобус. Мама не супраціўлялася, — кажа Максім, 31-гадовы сын Галіны Гулянковай. — Сьведка, які выступаў у судзе пад псэўданімам, сказаў, што Галіна Гулянкова на пэроне заклікала людзей да нейкіх дзеяньняў, якія зьневажаюць уладу, махала рукамі. Мама сказала, што сьведка лжэ і яе затрымліваў зусім іншы чалавек».
Судзьдзя Міхаіл Макарэвіч не пагадзіўся прагледзець відэа з камэр назіраньня, нягледзячы на просьбы Галіны Гулянковай.
«Мама была ў адчаі, цяжка было яе чуць. Спытала ў судзьдзі: што ёй, яшчэ 17 сутак сядзець? Судзьдзя сказаў: так, пажадаў ёй усяго добрага і пайшоў. Зьдзіўляе такая абыякавасьць да людзей. Гэта сталыя людзі, і зь іх так зьдзекуюцца, — кажа Максім. — Першае, што маці спыталася ў судзьдзі, — ці нармальна гэта, што сталая жанчына з хворай сьпінай сьпіць трэція суткі на падлозе? Але судзьдзя сказаў, што гэтае пытаньне не ў ягонай кампэтэнцыі».
Паводле Максіма, у маці хворая сьпіна, баліць нага, яна ходзіць з кіёчкам. Шмат хто напісаў у сацыяльных сетках і выказаў падтрымку ягонай маці.
«У яе анкалёгія, ёй выдалялі шчытападобную залозу, яна стаіць на ўліку. Яна прымае таблеткі і звычайна стараецца браць з сабой пэўную іх колькасьць, бо, улічваючы сёньняшнюю сытуацыю ў краіне, ня ведаеш, дзе апынесься заўтра», — расказвае сын.
Максім чакае, куды перавядуць маці і калі будзе магчымасьць перадаць ёй перадачу.
Галіна Гулянкова — карэнная мянчанка, вэтэран працы, шмат гадоў адпрацавала на прадпрыемстве «Гарызонт».
«Мама даволі актыўны і пазытыўны чалавек, заўсёды ідзе насустрач людзям, заўсёды стараецца дапамагчы», — кажа сын Галіны Гулянковай.
Цяпер чытаюць
«Толькі тры чалавекі будуць ведаць пра вас. Самы першы чалавек краіны». З'явіліся запісы размоў шпіёнкі Іны Кардаш з куратарам15
«Толькі тры чалавекі будуць ведаць пра вас. Самы першы чалавек краіны». З'явіліся запісы размоў шпіёнкі Іны Кардаш з куратарам
«Лукашэнка павінен панесці адказнасць за саўдзел у расійскай агрэсіі». Міністр замежных спраў Украіны расказаў пра новую палітыку ў дачыненні да Беларусі2424
Каментары