ТАСС сёння пацікавіўся рэакцыяй МЗС Беларусі на заявы літоўскага боку аб магчымай акрэдытацыі пасла ЗША Джулі Фішэр у Літве.
Сайт беларускага замежнапалітычнага ведамства прыводзіць словы прэс-сакратара ведамства Анатоля Глаза.
«Мы, шчыра кажучы, на гэты конт не маем ніякай афіцыйнай інфармацыі, а заявы розных літоўскіх асоб апошнім часам настолькі шматлікія і супярэчлівыя, што абапірацца на іх неяк несур'ёзна. Будзе больш яснасці — можна будзе казаць больш прадметна».
«Аднак акадэмічна, прафесійна нам не зусім зразумела нават, аб чым можа ісці гаворка, аб якой акрэдытацыі? Чыста гіпатэтычна, калі гэта акрэдытацыя пасла ў МЗС Літвы, то значыць у Літве будзе два паслы ЗША, якія будуць прадстаўляць там амерыканскія інтарэсы. Цалкам відавочна, што пасол, які знаходзіцца ў Літве, ніякага дачынення да Беларусі не можа і ніколі не будзе мець», — сказаў Анатоль Глаз.
21 красавіка намеснік міністра замежных спраў Літвы Мантас Адаменас паведаміў, што прызначаны Вашынгтонам у Мінск пасол ЗША Джулі Фішэр, якая не атрымала беларускую візу, можа быць акрэдытаваная ў Вільні.
Раней Адаменас паведаміў, што Вільнюс атрымаў зварот ЗША да літоўскага ўрада з просьбай акрэдытаваць пасла ў Літве. Па яго словах, афіцыйны адказ рыхтуецца. Ён дадаў, што Вільнюс становіцца «важнай сталіцай па працы з Мінскам», бо там знаходзіцца шмат міжнародных арганізацый, якія не могуць весці дзейнасць у Беларусі, а таксама штаб лідара беларускай апазіцыі Святланы Ціханоўскай.
У аўторак кіраўнік беларускага МЗС Уладзімір Макей заявіў, што Беларусь гатовая прыняць пасла ЗША, але хоча мець выразную і зразумелую перспектыву далейшага ўзаемадзеяння з амерыканскімі партнёрамі па ўсіх напрамках. Ён выказаў здзіўленне ў сувязі з заявамі Фішэр, у той час як Вашынгтон не даў выразнага адказу адносна таго, у якім статусе яна мае намер прыбыць у Беларусь.
Цяпер чытаюць
«За чатыры дні яе тройчы экстранна шпіталізавалі». Беларуска трапіла ў эміграцыйную турму ў ЗША пасля побытавай сваркі з партнёрам5
Каментары