Прэс-сакратар прэзідэнта Расіі Дзмітрый Пяскоў распавёў журналістам пра парадак удзелу Пуціна ў саміце па пытаннях клімату, а таксама аб перамовах з Аляксандрам Лукашэнкам, якія «пяройдуць у позні вечар», піша ТАСС.
Паводле Пяскова, Пуцін спачатку возьме ўдзел у анлайн-саміце па клімаце, які стартуе ў 15:00.
«Клімат — гэта адзін з прыярытэтаў, які быў агучаны ўчора на пасланні. Тэма важная, і прэзідэнту ёсць, што сказаць. Праўда, выступленні будуць дастаткова дынамічныя — па тры хвіліны прадугледжваецца рэгламентам», — сказаў Пяскоў.
Акрамя таго, па словах прэс-сакратара, у кіраўніка расійскай дзяржавы запланавана на першую палову дня міжнародная тэлефонная размова, аб якім Крэмль пазней праінфармуе СМІ.
Каля 17:00 Пуцін пачне перамовы з Аляксандрам Лукашэнкам, які прыбыў у Маскву. «Размова двух прэзідэнтаў, як правіла, дастаткова працяглая. Відавочна, што яна пяройдзе ў позні вечар», — рэзюмаваў прэс-сакратар.
«Вядома, [адбудзецца] абмен думкамі па цяперашняй сітуацыі ў плане і апошніх падзей з раскрыццём дыверсійных планаў у дачыненні да Беларусі і гэтак далей», — сказаў прадстаўнік Крамля.
Адказваючы на пытанне, які вынік перамоваў Масква будзе лічыць поспехам, Пяскоў нагадаў, што прэзідэнты РФ і Беларусі часта кантактуюць, а паміж дзвюма краінамі наладжаныя «шматгранныя адносіны». «Мы настолькі ўзаемазалежныя краіны, і настолькі аб'ёмныя задачы стаяць і ў рамках Саюзнай дзяржавы, і ў рамках асаблівых гандлёва-эканамічных адносін, інтэграцыі многіх прадпрыемстваў», — заявіў Пяскоў.
Ён адзначыў, што Пуцін і Лукашэнка ў тым ліку «пастаянна абмяркоўваюць бягучыя пытанні».
«І кожны раз пытанняў менш не становіцца», — дадаў прэс-сакратар расійскага лідара.
У адказ на пытанне, ці лічаць у Крамлі Лукашэнку надзейным партнёрам, Пяскоў толькі нагадаў, што той узначальвае Беларусь, з якой у Расіі ўтворана Саюзная дзяржава.
Таксама Пяскоў дадаў, што сітуацыя з замахам не паўплывае на інтэграцыю дзвюх краін.
Каментары