Астму ў маленькіх дзяцей звязалі з унутрывантробнай падвержанасцю забруджанаму паветру
Эмбрыёны вельмі ўразлівыя да шкодных часцінак у паветры, сцвярджаюць навукоўцы.
Згодна з новым даследаваннем, маленькія дзеці, мамы якіх падчас цяжарнасці дыхалі паветрам з вялікай колькасцю шкодных часцінак, нашмат больш схільныя да развіцця астмы.
Размова ідзе пра ультрадысперсныя часцінкі, якія трапляюць у паветра, акрамя ўсяго іншага, у складзе выхлапных газаў і дыму. Лічыцца, што гэтыя часцінкі паступаюць праз лёгкія будучай маці ў яе крываток, што выклікае запаленне. Хутчэй за ўсё, часцінкі таксама трапляюць праз плацэнту ў крываток эмбрыёна, піша Guardian.
У даследаванні ўзялі ўдзел амаль 400 жанчын і іх дзяцей з горада Бостан. Падчас цяжарнасці гэтыя жанчыны дыхалі паветрам з рознай канцэнтрацыяй ультрадысперсных часцінак — ад 10 да 40 тысяч на кубічны сантыметр. Высветлілася, што дзеці жанчын, якія дыхалі паветрам з канцэнтрацыяй 30 тысяч часцінак, у чатыры разы часцей хварэлі на астму, чым тыя, чые маці дыхалі паветрам з 15 тысячамі часцінак на кубічны сантыметр. Гэткая розніца ў забруджванні эквівалентна розніцы паміж аўтадарогай з інтэнсіўным рухам і маленькай вуліцай.
Навукоўцы звярнулі ўвагу, што той перыяд цяжарнасці, калі эмбрыёны найбольш уразлівыя да ўплыву ультрадысперсных часцінак, залежыць ад полу эмбрыёна. Яны выказалі здагадку, што, магчыма, часцінкі ўплываюць на развіццё гарманальнай сістэмы арганізма.
Цяпер чытаюць
«Лукашэнка на мінімалках». «Беларускі каханак усяе Русі» стаў кумірам жаночага тыктока1
«Лукашэнка на мінімалках». «Беларускі каханак усяе Русі» стаў кумірам жаночага тыктока
Пагражаў вайскоўцам раскрыць, хто з іх гомасэксуал, каб выпытаць сакрэты і прадаць Украіне. Вось за што адыёзны функцыянер БРСМ атрымаў 17 гадоў калоніі1212
Каментары