Змяненне клімату можа адбіцца не толькі на аб’ёмах вытворчасці гарбаты, але і на яе смаку. Паводле новай справаздачы, рост тэмператур і ўсё больш частыя экстрэмальныя пагодныя з’явы ў асноўных краінах-вытворцах робяць смак гарбаты менш стабільным і больш горкім. Праблемы ўжо адчуваюцца.
Гарбата належыць да культур, якія асабліва залежаць ад адносна стабільных кліматычных умоў. Для яе нармальнага росту неабходныя тэмпературы ў межах ад 13 да 30 градусаў Цэльсія, а таксама дастатковая, але не празмерная колькасць ападкаў. Аднак гэтыя ўмовы ўсё часцей парушаюцца ў краінах, дзе вырошчваецца значная частка сусветнай гарбаты, у тым ліку ў Кеніі, Індыі і Шры-Ланцы.
Пра гэта гаворыцца ў новай справаздачы міжнароднай арганізацыі Christian Aid, якая займаецца барацьбой з беднасцю, гуманітарнай дапамогай і пытаннямі адаптацыі да змянення клімату.
Як піша Sky News, аўтары дакумента адзначаюць, што смак гарбаты залежыць ад балансу розных хімічных злучэнняў у лісці, у тым ліку катэхінаў, амінакіслот і поліфенолаў.
Павышэнне тэмпературы ўплывае на гэты баланс: расліны пачынаюць выпрацоўваць больш рэчываў, якія надаюць напою даўкасць, у той час як кампаненты, адказныя за саладкаватыя ноткі, змяншаюцца. У выніку гарбата можа станавіцца больш горкай.
На якасць лісця ўплываюць і змены ў рэжыме ападкаў. Занадта моцныя або нерэгулярныя дажджы могуць зніжаць канцэнтрацыю рэчываў, якія фарміруюць характэрныя смак і водар гарбаты. Засухі і паводкі ствараюць дадатковы стрэс для раслін, што вядзе не толькі да зніжэння ўраджайнасці, але і да пагаршэння якасці прадукцыі.
Пра ўплыў надвор’я на плантацыі гарбаты сведчаць і самі фермеры. Паводле іх назіранняў, у вельмі сухія або непрадказальныя сезоны лісце становіцца драбнейшым, а якасць ураджаю пагаршаецца. Гэта, на іх думку, адбіваецца і на смаку гатовай гарбаты.
Праблема закранае не толькі традыцыйныя рэгіёны вырошчвання гарбаты. Нават у Вялікабрытаніі, дзе яе таксама культывуюць у невялікіх маштабах, змены клімату ўскладняюць атрыманне аднастайнага смаку прадукцыі з году ў год.
Брэнды гарбаты імкнуцца падтрымліваць характэрны смак сваёй прадукцыі. Аднак па меры таго як надвор’е становіцца менш прадказальным, забяспечваць такую стабільнасць становіцца ўсё цяжэй. Пры гэтым праблема не абмяжоўваецца толькі змяненнем смакавых характарыстык напою.
Зніжэнне ўраджайнасці і іншыя збоі ў вытворчасці, выкліканыя кліматычнымі зменамі, могуць прывесці да росту цэн, павелічэння выдаткаў і перабояў з пастаўкамі гарбаты.
Арганізацыя Christian Aid таксама прапануе шэраг мер, якія маглі б дапамагчы вытворцам адаптавацца да новых умоў. Сярод іх — вывядзенне больш устойлівых да спёкі і засухі сартоў гарбаты, удасканаленне сістэм арашэння і высадка дрэў, якія будуць ствараць цень для плантацый. Таксама арганізацыя выступае за справядлівае цэнаўтварэнне і дадатковае фінансаванне для фермераў, каб яны маглі ўкараняць меры па адаптацыі да новых кліматычных умоў.
Каментары