«Гэта ўнікальны выпадак!» Каля «Мінск-Свету» заўважылі птушку года
У панядзелак, 22 чэрвеня, чытач Onlíner падзяліўся рэдкім здымкам. На фота, зробленае гэтым жа ранкам, патрапіў чорны бусел. Яго заўважылі ў лесапаркавай зоне паміж вуліцай Асаналіева і раёнам «Мінск-Свет». Сустрэць гэтую птушку нават у дзікай прыродзе — вялікая ўдача, не кажучы ўжо пра цэнтр горада.
Чорны бусел лічыцца рэдкім відам ва ўсіх краінах, дзе жыве. У Беларусі ён уключаны ў Чырвоную кнігу. Дарэчы, у 2026 годзе менавіта чорны бусел быў названы птушкай года.
За каментарыем журналісты звярнуліся да заолага кампаніі «Дзікая прырода» Аляксандра Вінчэўскага. Спецыяліст адразу выказаў здагадку, што бусел мог паляцець з заапарка: занадта выключная сітуацыя. Аднак разгледзець кольца на назе птушкі не ўдалося.
— Вядома, гэта ўнікальны выпадак! Пралятаць над Мінскам яны могуць, але каб сесці ў горадзе… Маладыя птушкі яшчэ не зляталі з гнёздаў. Хутчэй за ўсё, гэта малады бусел, які вярнуўся з Афрыкі. Яны пачынаюць размнажацца ў 5—6 гадоў, але і да гэтага кожны год прылятаюць з поўдня на радзіму. Думаю, гэта адна з такіх птушак. Каб дарослая заляцела ў горад? Не ўяўляю такога. Яны наогул не любяць паказвацца людзям, баяцца. Звычайна палююць у лесе, на каналах і рэчках. Вядуць утойлівы лад жыцця.
Таксама Аляксандр адзначыў, што нярэдка за чорных буслоў прымаюць белых, запэцканых у мазуце. Адметная рыса менавіта чорных — голая чырвоная скура вакол вачэй.
У адрозненне ад свайго белага суродзіча, чорны бусел ніколі не ўтварае калоній і не селіцца бліжэй чым за кіламетр ад суседа.
Любімае месца жыхарства — буйныя дубы, асіны або сосны з тоўстымі галінамі. Дрэвы павінны быць дужымі, каб вытрымаць гняздо вагой у некалькі соцень кілаграмаў. Акрамя таго, важная пышная крона, якая зможа схаваць сям’ю ад драпежных птушак.
Як распавёў заолаг, гнёзды могуць выкарыстоўвацца дзесяцігоддзямі. Так, у Беларусі ёсць гняздо, у якім чорныя буслы жывуць ужо амаль 20 гадоў.
Цяпер чытаюць
Арыштаваны сенатар Карпіцкі, галоўны доктар Брэсцкай абласной бальніцы4
Каментары