Старшыня Вярхоўнага суда Эбрахім Раісі перамог на выбарах прэзідэнта ў Іране. Імя новага кіраўніка дзяржавы назваў кіраўнік штаба па правядзенні выбараў Ісламскай Рэспублікі Джамаль Орф.
«28 мільёнаў 600 тысяч нашых суайчыннікаў узялі ўдзел у гэтых выбарах… Раісі набраў 17,8 мільёна галасоў», — заявіў Орф. Паводле яго слоў, гэтыя лічбы пакуль папярэднія, аднак ужо даюць магчымасць гаварыць пра перамогу Раісі, піша ТАСС.
Вядома, што сакратар Рады па мэтазгоднасці рашэнняў Махсэн Разаі набраў больш за 3,3 мільёна галасоў, былы кіраўнік Цэнтрабанка Ірана Абдальнасер Хемаці — 2,4 мільёна галасоў, намеснік старшыні Меджліса Хасейн Амір Казізадэ Хашэмі — больш за 1 мільён галасоў.
Афіцыйныя вынікі выбараў будуць абвешчаныя на працягу дня, удакладніў Орф. Пры гэтым усё супернікі ўжо павіншавалі Раісі з перамогай.
Прэзідэнцкія выбары прайшлі 18 чэрвеня. Усяго да іх былі дапушчаныя сем кандыдатаў з 592, што падалі заяўкі.
Як піша BBC, Раісі вядомы сваёй антызаходняй рыторыкай і лічыцца блізкім да Вярхоўнага лідара Ірана Алі Хаменеі.
Аятале 82 гады, і многія прадказваюць яму ў пераемнікі менавіта Раісі. Ён на 20 з лішкам гадоў маладзейшы, і да прызначэння Вярхоўным суддзёй у 2019 годзе займаў пасады генпракурора і намесніка Вярхоўнага суддзі.
Раісі ў 1988 годзе быў адным з чатырох суддзяў, якія засядалі ў так званых «камісіях смерці» і адправілі на пакаранне дзясяткі тысяч чалавек. У 2017 годзе ён ужо ўдзельнічаў у прэзідэнцкіх выбарах, але прайграў Хасану Раўхані.
Два гады таму ЗША дадалі Раісі ў санкцыйны спіс.
Цяпер чытаюць
Жалезная заслона ў дзеянні: як зменшылася колькасць перасячэнняў мяжы Беларусі і Еўрасаюза за апошнія гады27
Каментары