Турцыя, Грузія, Краснадарскі край. Дзе гэтым летам адпачываюць беларускія селебрыці
Сёлета многім не да адпачынку. Хтосьці мяняе планы з-за часткова закрытых межаў, хтосьці з-за экстраннай рэлакацыі. Паглядзелі, куды гэтым летам выбраліся беларускія селебрыці.
Меліціна Станюта
Тур па Грэцыі зладзіла для сябе Меліціна Станюта. Гімнастка пабывала на вулканічным востраве Сантарыні з яго карціннымі белымі домікамі і блакітнымі дахамі, на Закінтасе з лазурнай бухтай. Да ўзбярэжжа Меліціна дабіралася рэйсам Масква — Стамбул — Афіны.
«Прызямлілася ў іншай краіне, а здаецца, што на іншай планеце», — дзеліцца гімнастка ў інстаграме.
Дзмітрый Кахно
Згубіўшы працу на беларускім ТБ, Дзмітрый Кахно з сям’ёй пераехаў у Маскву. Адпачываць яны з жонкай і дзецьмі выбраліся ў Анапу (Краснадарскі край).
«Першыя суткі ляцелі, другія — сварыліся, на трэція ўсё стала добра. Ніводнае падарожжа не праходзіць у нас без «я з табой больш нікуды не паеду», — шчыра пісаў Кахно.
На моры тэлевядоўца займаўся кайтбордзінгам — выходзіў у мора на дошцы пад паветраным змеем.
Яўген Перлін
Шоўмен абраў Грузію — бадай, адзін з самых даступных цяпер кірункаў для беларусаў. У маршруце — Батумі, Тбілісі, вінная Кахеція. У Грузіі, дарэчы, Яўген зрабіў прапанову рукі і сэрца сваёй дзяўчыне, мінскай дэкаратарцы. Яна адказала «так».
Дзяніс Кур’ян
У Турцыю з дзецьмі адправіўся Дзяніс Кур’ян. «Акунуць хуліганаў у морачка», — жартам апісаў ён планы на адпачынак. Тэлявядоўца спыніўся ў горадзе Белек на Міжземным моры. Дзеліцца, што сакрэт добрага адпачынку з дзецьмі — сейф у нумары, дзе захоўваюцца гаджэты і выдаюцца строга ў вызначаны час.
Вольга Барабаншчыкава
Былая тэнісістка і спявачка таксама лятала ў Турцыю. З курортаў Вольга абрала Бодрум — горад на ўзбярэжжы Эгейскага мора. Яна збіралася адпачыць у Чарнагорыі, але пасля інцыдэнту з самалётам і закрыццём паветранай прасторы планы давялося змяніць.
«Турцыя ў нас была забраніравана як запасны варыянт на канец чэрвеня. Але ў мяне быў такі эмацыйны стан, што я проста хацела куды-небудзь паляцець. І як можна раней», — пісала Вольга.
Антон Мартыненка
Блогер таксама адпачывае на моры — Мінскім. Гэтае лета Антон праводзіць у Беларусі — назірае заходы сонца над вадой і шпацыруе па горадзе з маленькай дачкой.
«З добрымі навінамі ў Беларусі цяжка, таму проста нагадваю: у нас усё яшчэ самыя прыгожыя дзяўчаты ў свеце», — падбадзёрвае Мартыненка.
На Шры-Ланцы ў 37 гадоў памёр беларускі кінапрадзюсар Андрэй Маталыга4
Каментары