Нават калі вы даўно выраслі, не выпусціце магчымасць зладзіць сабе дзень чытання калядных кніг са ўсёй сям'ёй. Папесціце сваё ўнутранае дзіця, прачытайце яму казку, якая прымусіць паверыць у цуды. «Наша Ніва» склала для вас падборку калядных кніг.
«Калядныя гісторыі», Чарльз Дыкенс
«Калядныя гісторыі» былі задуманы Дыкенсам як сацыяльная пропаведзь, і ў 40-я гады XIX стагоддзя кожны год пад Каляды выходзіла адна з пяці аповесцяў. Аўтар звяртаўся і да бедных, і да багатых чытачоў, радзеючы за паляпшэнне долі першых і «маральнае выпраўленне» другіх.
Вынікам стаў цыкл з пяці твораў, перакладзеных на ўсе сусветныя мовы, неаднаразова экранізаваных і стаўшых сапраўды несмяротнай класікай сусветнай літаратуры. Гэта цыкл, у якім змешваюцца казка і быль, фантастыка і рэальнасць, а ў фінале Дабро абавязкова перамагае Зло.
«Хлопчык у Хрыста на ёлцы», Фёдар Дастаеўскі
Аповед пра дзіця, якое зачаравана выглядам навагодняй ёлкі за акном багатага дома. Там святло, агні, пачастункі і падарункі, прыбраныя дзеці гуляюць і танчаць. А галодны хлопчык замярзае на пецярбургскіх вуліцах, кінуты на волю лёсу сваімі няшчаснымі бацькамі. У нейкі момант хлопчык апынаецца на навагоднім свяце сярод такіх жа, як і ён, дзяцей, захоплены невядомым ціхім голасам…
«Планета навагодніх ёлак», Джані Радары
Італьянскаму хлопчыку Марка аднойчы падарылі на Новы год дзіцячага коніка. Спачатку Марка раззлаваўся на дзядулю за такі падарунак — ён жа лічыў сябе ўжо зусім дарослым. Калі б ён толькі ведаў, што дзякуючы гэтай цаццы апынецца на іншай планеце. Замест таксі тут раз'язджаюць драўляныя конікі, цацкі з крам можна браць бясплатна, і кожны дзень — навагодні! Надвор'е заўсёды цудоўнае, а калі раптам пойдзе дождж — то толькі з цукерак!
«Кот на Каляды», Кліўленд Эмары
Кніга распавядае пра тое, як аднойчы на куццю ў доме знакамітага пісьменніка з'яўляецца вандроўны белы кот, які адразу мяняе жыццё. Тое, што яны знайшлі адзін аднаго пад Каляды — лепшы падарунак, які магло паднесці жыццё. Кот шмат чаму навучыць свайго гаспадара.
«Дары волхваў», О. Генры
Дзеянне апавядання адбываецца ў Нью-Ёрку напярэдадні Калядаў. Джым і Дэла Янг — маладая пара, якая ледзь зводзіць канцы з канцамі, пражываючы ў адным з бедных кварталаў мегаполіса. Перад надыходзячымі святамі яны выяўляюць, што, нягледзячы на эканомію, іх зберажэнняў не хапае на традыцыйныя калядныя падарункі. Як яны павіншуюць адно аднаго?
«Як бы чароўная казка», Грэм Джойс
Гэта ў літаральным сэнсе чарадзейны раман ад майстра брытанскага магічнага рэалізму. 16-гадовая гераіня пайшла гуляць у лес і прапала без вестак. Родныя, суседзі і паліцыя доўга шукалі яе, але не знайшлі ніякіх слядоў дзяўчыны. Праходзіць 20 год пасля знікнення, як раптам яна вяртаецца. Дзяўчына зусім не змянілася, быццам не пастарэла ні на дзень. І тыя гісторыі, якія яна расказвае, інакш, як казкамі, не назавеш.
«Шчаўкунок і Мышыны Кароль», Эрнст Гофман
Гісторыя Шчаўкунка зачароўвае і натхняе нас ужо 200 гадоў. Яна пра веру ў цуд, тую самую, што жыве ў кожным з нас. Аднойчы ў каралеўскай сям'і нарадзіўся доўгачаканы спадчыннік, але з-за сваркі з Мышынай Каралевай выдатны прынц ператвараецца ў выродлівага Шчаўкунка, доля якога — калоць арэхі і чакаць. Чакаць, пакуль гадзіннік не прабʼе 12 разоў.
Каментары