Эканоміка

«У нас у горадзе няма такога попыту, каб плаціць такія падаткі». Іпэшнікі разважаюць, як працаваць у новых умовах

З пачатку года для многіх прадпрымальнікаў адмянілі спрошчаную сістэму падаткаабкладання. Што цяпер робяць тыя, каго закранулі змены? ІП расказалі, якія варыянты яны шукаюць, каб не страціць у грашах.

Ілюстрацыйны здымак

«Расходаў як такіх у мяне няма, таму падатак лічыцца ад усёй выручкі»

Уладзімір сем год як займаецца міжнароднай лагістыкай. З 2019-га адкрыў сваё ІП. Да падатковых змен ён працаваў па спрошчанай сістэме і плаціў 5% падатку. Цяпер пераходзіць на агульную сістэму з падаткам у 16%.

«Расходаў як такіх у мяне няма: я працую дома, з абсталявання камп’ютар ды крэсла. Таму падатак будзе лічыцца ад усёй выручкі», — кажа мужчына.

Каб не страціць у грашах, ён будзе павялічваць кошт сваіх паслуг.

«Напрыклад, я вязу тавар за сто даляраў, а кліент плаціць 150. З гэтых 50 даляраў мне трэба аддаць 16% падатку. Буду павялічваць свой профіт. Аднак кліент істотна не адчуе, я працую з замежнікамі», — тлумачыць Уладзімір.

Можна было б адкрыць фірму і працаваць па спрошчанай сістэме, але прадпрымальнік не бачыць у гэтым сэнсу.

«Вывад грошай на картку давялося б рабіць праз дывідэнты, і з іх таксама плаціць 16% падаходнага падатку».

«Буду павышаць цэны»

Вольга як ІП аказвае бухгалтарскія паслугі. Па яе падліках, падаткі для яе вырастуць у 2,6 раза.

«Гэта калі вылічаць расходы, а інакш рост быў бы ў тры разы. Мне выгадна ўказваць расходы як 20% ад выручкі, без пацвярджэння дакументамі», — кажа жанчына.

Яна ўжо на пенсіі, але нягледзячы на змены ў падатках, закрывацца не плануе.

«Пенсія самі разумееце якая. Яшчэ ёсць здароўе працаваць. Буду павышаць цэны. Абмеркавалі гэта з кліентамі яшчэ да Новага года, каб яны разумелі, чаго чакаць. Яны безвыходна адрэагавалі, — усміхаецца. — Бухгалтар ім патрэбны, дый даўно працавалі разам».

«Тут такая пастка, што пераафармленне не дапаможа»

«Тут такая пастка, што пераафармленне не дапаможа, — кажа яшчэ адзін прадпрымальнік пра магчымы выхад. — Адзін варыянт, калі ў цане паслугі шмат затрат, то пазначаць іх, але тут патрэбны талковы бухгалтар. Ну і скарачаць безнаяўны разлік і старацца працаваць за наяўныя».

Ігар аказвае сантэхнічныя паслугі ў абласным горадзе. Наняць бухгалтара яму будзе каштаваць ад 50 даляраў у месяц, у залежнасці ад аб’ёму працы.

«Ёсць паслугі, у якіх 50-60% — гэта матэрыялы і падаткі. Напрыклад, усталяваць пральную машыну каштуе 80 рублёў, але для гэтага патрэбны кран, шлангі, перахаднікі. Гэта недзе 35 рублёў. Бываюць паслугі, дзе толькі праца», — удаецца ў дэталі мужчына.

Прадпрымальнік таксама збіраецца падымаць цэны — і для арганізацый, і для фізасоб.

«Многія знаёмыя плануюць закрывацца або пераходзіць на наяўныя разлікі. Цяпер ІП мала чым адрозніваецца ад мікрафірмы. Адзінае, што да трох работнікаў абмежаванне.

Самае крыўднае, што яны павышаюць падаткі і не прапаноўваюць нічога ўзамен. У нас у горадзе няма такога попыту і абароту, каб плаціць такія падаткі не па спрошчанай сістэме», — дзеліцца набалелым Ігар.

«800 лішніх рублёў кожны месяц трэба аддаць на падаткі»

Васіль з жонкай гандлююць прадуктамі, трымаюць дзве невялікія кропкі ў гандлёвым цэнтры. Яны плацяць адзіны падатак. Раней гэта было 137 рублёў на месяц за кожную кропку. З гэтага года стаўка істотна вырасла — да 548 рублёў.

«Заробак у апошні час на дваіх складаў 2000-2500 рублёў. Цяпер з іх яшчэ 800 лішніх кожны месяц трэба аддаць», — прыводзіць лічбы прадпрымальнік.

Мужчына даўно працуе як ІП, кажа, раней калі падаткі павышалі, гэта было плюс 5-10%. Такі скачок упершыню. 

«Паспрабуем падняць крыху цэны, хоць гэта абсалютна не выйсце са становішча, яны і так растуць у закупачным кошце. Дый пакупніцкая здольнасць народу, можна сказаць, ніякая. Пару месяцаў папрацуем па новых стаўках, а што далей — абсалютна не ведаем».

Чытайце таксама:

Апублікавалі абноўлены Падатковы кодэкс. Расказваем пра асноўныя змены

Беларускі парадокс. Нават шалёны попыт на будаўнічыя матэрыялы не дапамог цэментным заводам выйсці на прыбытковасць?

Каментары

Цяпер чытаюць

Ці пагражае Крыму блакада праз паралізаваны Крымскі мост?16

Ці пагражае Крыму блакада праз паралізаваны Крымскі мост?

Усе навіны →
Усе навіны

Ізраіль загрузіў мільёны фотаздымкаў у сістэму распазнавання твараў Amazon, каб сачыць за палесцінцамі7

У МУС расказалі, колькі працоўных мігрантаў прыехала ў Беларусь і колькі злачынстваў яны здзейснілі1

Як у кіно. У цэнтры Гродна 19‑гадовы хлопец з аднаго ўдару паваліў слуп13

Свет на парозе фінансавага абвалу, яшчэ больш агрэсіўны Трамп і небяспека для Тайваня. The Economist даў прагноз на 2027 год13

Жанчыне, якая арганізавала ў Мінску незалежную культурную прастору, далі пяць гадоў калоніі18

Самая танная кватэра — 222 тысячы рублёў. МАПІД прапанаваў кватэры ў «Сонечным» для ўсіх ахвотных6

46‑гадовага мінскага псіхолага і бізнэс-трэнера пасадзілі па палітычнай справе2

Прэзідэнт Манголіі, які тры тыдні таму сустракаўся з Лукашэнкам, падаў у адстаўку, абвінавачаны ў карупцыі1

У Германіі малады беларус ушчэнт раскалаціў фуру аб аўтадом пенсіянераў. Кіроўцаў ратавалі з дапамогай верталётаў

больш чытаных навін
больш лайканых навін

Ці пагражае Крыму блакада праз паралізаваны Крымскі мост?16

Ці пагражае Крыму блакада праз паралізаваны Крымскі мост?

Галоўнае
Усе навіны →

Заўвага:

 

 

 

 

Закрыць Паведаміць