Працаваць больш, а атрымліваць — столькі ж. Вузкім спецыялістам у дзіцячых садах хочуць павялічыць нагрузку, педагогі абураныя
На пачатку наступнага года вузкім спецыялістам (дэфектолагам, выкладчыкам фізкультуры і музыкі) дашкольных устаноў Беларусі плануюць змяніць рэжым працы і нагрузку, пры гэтым заробак застанецца ранейшым. Пра гэта парталу Zerkalo.io паведамілі педагогі некалькіх дзіцячых садоў. Супрацоўнікі збіраюць подпісы супраць такога рашэння і напісалі калектыўныя лісты ў Міністэрства працы і сацабароны, а таксама ў Прафсаюз работнікаў адукацыі і навукі.
Як расказалі педагогі, ім з калегамі аб новым праекце Міністэрства адукацыі стала вядома яшчэ ў снежні мінулага года. Ён распрацаваны «ў мэтах аптымізацыі штатнай колькасці работнікаў устаноў дашкольнай адукацыі і спецыяльных дашкольных устаноў».
‒ Не ўсе спецыялісты ў курсе таго, што могуць быць нейкія перамены. Напрыклад, у Віцебску ў двух раёнах людзям ужо паведамілі, а ў адным ‒ яшчэ не. Нам расказалі, што сутнасць праекта такая: хочуць змяніць рэжым працы і нагрузку вузкім спецыялістам дашкольных устаноў ‒ кіраўнікам фізічнага выхавання, музычным кіраўнікам, дэфектолагам. Рабочы час плануюць павялічыць прыкладна ў 1,5 раза і на столькі ж павялічваюць нагрузку, а заробак пры гэтым пакідаюць ранейшы. Напрыклад, цяпер у музычных кіраўнікоў ‒ 4 групы дзяцей на стаўку, а плануюць зрабіць 6-7. Працоўны дзень на стаўку павялічваецца з 24 гадзін да 30 у тыдзень.
Паводле інфармацыі педагогаў, згодна з праектам пастановы, разлічваць заробак выкладчыкам музыкі і фізкультуры ў дзіцячых садах плануюць за колькасць груп, а не дзяцей. У выніку, як кажуць самі спецыялісты, гэта зменшыць аплату працы і прывядзе да скарачэння колькасці работнікаў у дзіцячых садах.
‒ Да прыкладу, у Віцебску вузкі спецыяліст са стажам 10 гадоў, першай кваліфікацыйнай катэгорыяй і нагрузкай 1,25 стаўкі зарабляе 600-700 рублёў. На стаўку выходзіць каля 500. Калі будзе ўкаранёны новы штатны расклад, то гэта ўжо будзе не 1,25 стаўкі, а проста стаўка, ‒ кажуць спецыялісты.
Педагогі ў розных рэгіёнах Беларусі пачалі збіраць подпісы супраць новаўвядзення. Таксама яны напісалі ліст у Міністэрства працы і сацабароны. З ведамства прыйшоў адказ (датаваны 10 лютага), што запыт ад педагогаў перанакіраваны ў Міністэрства адукацыі.
Там журналісту Zerkalo.io пракаментаваць наяўнасць ці распрацоўку праекта новай пастановы не змаглі. Таксама зазначылі, што пакуль педагогі ў Міністэрства адукацыі не звярталіся.
«Настаўнік не павінен звяртаць увагу на зарплату, бо гэта пакліканне». Пяць фактаў пра новага міністра адукацыі
У Беларусі 430 тысяч работнікаў адукацыі, з іх педагогаў толькі палова. Хто астатнія людзі?
Цяпер чытаюць
«Спасибо, Лена! Продолжайте вести наблюдение». Афіцэр, які пісаў Харысавай, пасвіўся ў чатах палітэміграцыі, а некаторым дзяўчатам нават прапаноўваў абмяняцца нюдсамі9191
Каментары