У Беларусі 430 тысяч работнікаў адукацыі, з іх педагогаў толькі палова. Хто астатнія людзі?
На сайце Міністэрства адукацыі пазначана, што ўсяго ў сістэме працуе 430 тысяч супрацоўнікаў. На ўсіх жа ступенях адукацыі (усяго ў краіне 8 тысяч установаў) вучацца каля 3 мільёнаў чалавек. Выходзіць менш за 7 навучэнцаў на аднаго педагога. Але ж тут цяжка не прыгадаць штогадовае павелічэнне класаў: у некаторых больш за 30 вучняў. Што не так?
Адказ знаходзім на тым жа сайце, перашоўшы па спасылцы на «Статыстучную мапу 2020 года», якая адлюстроўвае колькасць непасрэдна педагогаў дашкольнай, агульна-сярэдняй, профільна-тэхнічнай, сярэднеспецыяльнай і вышэйшай адукацыі — усіх педагогаў Рэспублікі Беларусь.
Застаецца скласці лічбы па ступенях адукацыі і абласцях, атрымліваем 191 046 чалавек.
Калі з 430 тысяч непасрэдна з дзецьмі (ад садка да ВНУ) працуе 191 тысяча супрацоўнікаў, то амаль 240 тысяч «работнікаў сістэмы адукацыі» — хто гэтыя людзі?
«Наша Ніва» звярнулася ў прэс-службу Міністэрства адукацыі. Там лічбы пацвердзілі. На пытанне: «Чым 240 тысяч супрацоўнікаў, недатычных да працэсу адукацыі, займаюцца?», адказалі, што гэта «усе астатнія, напрыклад, няні ў садках».
Таксама адзначылі, што тэхнічны персанал школ у лік «работнікаў сістэмы» не ўваходзіць.
«Непасрэдна ў Міністэрстве працуе 113 чалавек,» — тлумачаць у прэс-службе, а вось у абласных і раённых аддзелах адукацыі «150 тысяч будзе, а можа, і больш».
Гэта менавіта тыя людзі, якія распрацоўваюць метадычную і нарматыўную базу (напрыклад, узор подпісу рабочых сшыткаў, колькасць радкоў паміж работамі ці нават максімальную вышыню кветак у кабінетах) ды, галоўнае, здзяйсняюць праверкі.
Цяпер іх будзе і яшчэ болей: з 2 лютага 2022 года пачынае дзійнічаць новая структура — «Нацыянальнае агенцтва па забеспячэнні якасці адукацыі», якое ўзначаліла Вольга Рыбаключава (выпускніца акадэміі МУС і былая следчая Заводскага РАУС Мінска).
Чарговая новаўтвораная структура, як зазначаецца, будзе сачыць за выкананнем новага Кодэкса аб адукацыі і спрыяць «павышэнню якасці адукацыі».
Чытайце яшчэ:
«Гэта чарговы манеўр, каб пакпіць з, як яны кажуць, «беглых». Настаўнікі пра новы Кодэкс аб адукацыі
Цяпер чытаюць
«Узнікаюць уяўленні, што палітвязні мусяць быць стойкімі, сабранымі, удзячнымі. А рэальнасць розная». Пагаварылі з людзьмі, якія водзяць дэпартаваных літаральна за руку66
Каментары