У беларускую роту тэрабароны Украіны запісаліся сямёра маладафронтаўцаў
Адзін з іх — кіраўнік «Маладога фронту» Дзяніс Урбановіч. У беларускай роце ён атрымаў пазыўны «Ваўкалак».
Пра гэта піша «Радыё Свабода».
Кіраўнік «Маладога фронту» Дзяніс Урбановіч з'ехаў ва Украіну напрыканцы 2021 году праз пераслед у Беларусі.
Пра першы дзень вайны Урбановіч успамінае так: «Спаў, чую — раз бахнула, потым другі. Мяне пабудзілі, кажуць: гэта расейскія ракеты. Залез у інтэрнэт, бачу, што Расея напала на Украіну. Сталі перазвоньвацца са сваімі хлопцамі, куды далучацца. Ідзем на вайну? Ідзем, адказваюць».
Дзяніс кажа, што акурат гэтымі днямі меўся пераязджаць у Літву, меў адтуль запрашэнне. Тым не менш падкрэслівае: нават калі б з'ехаў, то ўсё адно вярнуўся б назад ва Украіну.
«Нас тут толькі маладафронтаўцаў сямёра чалавек. Усіх падрабязнасцяў расказваць не магу, але праходзім падрыхтоўку», — кажа Дзяніс.
Урбановіч толькі што адбыў дзённы нарад. Па галасах у казарме чуваць, што хлопцы ставяцца да ўсяго з гумарком, даносіцца шмат жартаў і смеху. Пры кожнай паветранай трывозе знікае інтэрнэт.
«Настрой у нас бадзёры. Верым, што пераможам Расею, а пасля вызвалім Беларусь. Думаю, усё так і будзе. Галоўнае сёння для нас — скончыць з пуцінскай уладай, бо яна — апора для дыктатур і ў сябе, і ў Менску», — кажа ён.
У беларускай роце тэрытарыяльнай абароны «Азова» Урбановіч атрымаў пазыўны «Ваўкалак». На баявыя дзеянні яго з таварышамі пакуль не адпраўлялі.
«Я не заўважаю, што стаўленне да беларусаў пагоршылася. Чуў, што нехта такое кажа, але сам асабіста з такім не сутыкаўся нідзе. Усё крута, нас добра ўспрымаюць, ніякіх пытанняў няма», — кажа Урбановіч.
Цяпер чытаюць
У Гомелі закрылі забягалаўку прадпрымальніка-лукашыста і знішчылі яго плакат са Сталіным4
Каментары