«Вялікая сямёрка» выдзеліць 19,8 млрд даляраў на ўмацаванне фінансавай сістэмы Украіны
Краіны «Вялікай сямёркі» (G7) паабяцалі выдзеліць 19,8 млрд даляраў на ўмацаванне ўкраінскай фінансавай сістэмы, пакуль Кіеў змагаецца з расійскім уварваннем. Пра гэта гаворыцца ў камюніке, апублікаваным пасля завяршэння сустрэчы міністраў фінансаў краін G7, якая адбылася ў 20 траўня, паведамляе Радыё Свабода.
«У 2022 годзе мы перадамо 19,8 млрд даляраў на падтрымку бюджэту, у тым ліку 9,5 млрд даляраў нядаўніх абавязацельстваў… каб дапамагчы Украіне закрыць дэфіцыт бюджэту і працягваць забяспечваць прадастаўленне базавых паслуг украінскаму народу», — гаворыцца ў камюніке.
Акрамя таго, у ім вітаюць працу G7 і міжнародных фінансавых устаноў па далейшым фінансаванні Украіны, у прыватнасці — прапанову Еўрапейскай камісіі аб наданні дадатковай макрафінансавай дапамогі ў памеры 9 мільярдаў еўра.
Дадатковая запланаваная падтрымка ўкраінскіх дзяржаўных прадпрыемстваў і прыватнага сектара праз Еўрапейскі банк рэканструкцыі і развіцця і Міжнародную фінансавую карпарацыю складае 3,4 мільярда даляраў.
Паводле ацэнак Украіны, ёй патрабуецца каля 5 мільярдаў даляраў у месяц, каб падтрымліваць выплату заробку дзяржаўным служачым і працу адміністрацыі.
Каментары