Лукашэнка назваў прэзідэнта ЗША дачаснікам.
Падчас размовы з беларускім кіраўніком журналіст Russia Today Рык Санчэс лісліва распавёў нібыта пра высокі ўзровень падтрымкі Лукашэнкі з боку насельніцтва. Паводле яго слоў, даныя апытанняў, праведзеных беларускімі сацыёлагамі, паказваюць падтрымку на ўзроўні 78% насельніцтва краіны, піша БелТА.
«Некаторыя заходнія лідары, такія як Трамп, Макрон, Стармер, — яны ўсе разам узятыя, магчыма, не маюць такой падтрымкі свайго насельніцтва і толькі мараць пра тое, каб іх так падтрымлівалі, — сказаў Санчэс. — Можа быць, яны і кажуць, што вы дыктатар, і так да вас ставяцца менавіта таму, што, магчыма, зайздросцяць лічбам?»
«Сярод палітыкаў пэўная зайздрасць адзін да аднаго ў нас ёсць. Гэта сапраўды так, — сказаў Лукашэнка. — Вы абсалютна маеце рацыю, я таксама пра гэта часта думаю. Дай бог, каб у нейкага заходняга палітыка было не 78 працэнтаў і не 80 працэнтаў, але хаця б 60 працэнтаў (падтрымкі насельніцтва)».
Лукашэнка выказаўся і пра прэзідэнта ЗША Дональда Трампа.
«Ён дачаснік, у яго 4 гады. Што ён за 4 гады зробіць? Нічога. Нічога не зробіць. Таму ў прэзідэнта павінен быць час», — сказаў Лукашэнка, які аднаасобна кіруе ўжо амаль 32 гады Беларуссю.
У 2020 годзе Аляксандр Лукашэнка, паводле ацэнак назіральнікаў, прайграў выбары Святлане Ціханоўскай, але не аддаў улады, а распачаў масавыя рэпрэсіі.
Прычым паводле вынікаў поствыбарчага дзяржаўнага апытання, за Аляксандра Лукашэнку прагаласавалі 21%, за Святлану Ціханоўскую — 33%. 11% заявілі, што не галасавалі, а яшчэ 26% не захацелі адказваць на пытанне.
Тым часам Лукашэнку намалявалі 80%, а Ціханоўскай — усяго 10%.
На выбарах 2015 года за Лукашэнку збіраліся галасаваць 45%. Астатнія кандыдаты (уключна з Таццянай Караткевіч) мелі падтрымку на ўзроўні статыстычнай памылкі — ніжэй за 1%. Але ажно 52% адмовіліся адказваць на пытанне сацыёлагаў.
Каментары
И глядя, на глумливые заявления лукашенко, в адрес трампа, последние 2 дня, так оно и есть.