Кава проста настойваецца ў цішыні. Незвычайную каву ў бутэльках робіць кавярня ў Гродне
Гродзенская кавярня «Наша кава» зноў пачала выпускаць спецыяльную халодную каву — cold brew. Яе разліваюць у шкляныя бутэлькі аб’ёмам 0,33 л. Пра гэта Hrodna.life распавёў уладальнік «Нашай кавы» Дзмітрый Захарка.
Каву ў бутэлькі разліваюць у кавярні кожнае лета з 2018 года. Не разлівалі толькі ў 2021-м.
«Перад тым, як закаркаваць бутэльку, каву настойваюць у халоднай вадзе на працягу 12 гадзін гадзін і болей», — расказаў Дзмітрый Захарка.
Працэс прыгатавання адбываецца без ціску і высокай тэмпературы. Кава знаходзіцца ў цішыні і проста настойваецца.
Смак будзе розны, бо зерне будзе змяняцца
У гэтым годзе ў шкляныя бутэлькі разлілі каву гатунку «Руанда нюнгвэ (nyungwe)». Але гэтае зерне ў Гродне ўжо скончылася, дадаў Захарка. Таму далей у кавярні плануюць працаваць з іншымі гатункамі. «Таксама «Руанда», але ўжо іншая», — сказаў Дзмітрый.
«Такая кава карыстаецца папулярнасцю сярод тых, хто імкнецца пакаштаваць нешта новае і якаснае», — лічыць Дзмітрый.
Раней каву cold brew ў шкляных бутэльках 0,33 л прапаноўвалі летам таксама ў кавярні «Наше место».
Каментары