«Помста за смеласць». Што вядома пра адваката Данілевіча, якога забралі ў КДБ?
Адвакат Аляксандр Данілевіч перастаў выходзіць на сувязь 20 мая. Пазней стала вядома, што ён знаходзіцца ў СІЗА КДБ. Сабралі, што вядома пра яго, на гэты момант.
Старэйшы сын Аляксандра (Данілевіч — шматдзетны бацька) распавёў «Нашай Ніве», што яны з бацькам сустрэліся напярэдадні яго «знікнення»:
«Я аддаў бацьку ровар і мы разышліся па дамах, а пазней увечары ён перастаў быць анлайн ва ўсіх сацсетках і не адказваў на званкі».
Пасля, 23 мая, Данілевіч аб’явіўся ў Тэлеграме на некаторы час — сваякі выказваюць здагадку, што ў тэлефоне сядзелі тыя, хто яго затрымаў. Больш ніякіх навін ад Аляксандра не было.
Ні блізкія, ні калегі пакуль не могуць сказаць дакладна, за што затрымалі Аляксандра. Яго адвакат знаходзіцца пад падпіскай. Калегі таксама не ў курсе дэталяў.
«На жаль, у гэтых умовах цяжка нешта высветліць», — як адзін адказвалі нам знаёмыя з Аляксандрам юрысты. Некаторыя ўвогуле адмовіліся ад каментарыяў.
«З апошняга — тата падпісаў адкрыты антываенны зварот адвакатаў і юрыстаў датычна дзеянняў ва Украіне, але мы не ведаем, ці звязана гэта неяк», — кажа сын Аляксандра.
Адразу пасля падпісання ліста супраць вайны ў Данілевіча пачаліся праблемы ў адвакатуры — завялі дысцыплінарную вытворчасць. Таксама яго звольнілі з БДУ, дзе ён больш за 20 год выкладаў на факультэце міжнародных адносін.
Для студэнтаў яго сыход стаў сапраўднай стратай. Вось як пра яго адгукаецца адна са студэнтак Саша:
«Аляксандр Станіслававіч — найталенавіцейшы выкладчык, з суперпадачай матэрыялу, харызмай і пачуццём гумару. І, як мы ўсе бачым па сітуацыі, што склалася, адданы сваім прынцыпам і сумленны.
Ëн адзін з нешматлікіх выкладчыкаў права, які асабіста ў мяне выкараніў страх да юрыдычнай прафесіі. І калі шмат хто ва ўніверсітэце спрабаваў напалохаць вялікай канкурэнцыяй на рынку працы, то ён нам на выпускным курсе сказаў: «Не перажывайце, дзеці, усё ў вас усіх будзе добра».
Сябар Аляксандра выказвае здагадку, што гэта помста яму за смеласць і сумленнасць у выказваннях: адвакат не хаваў сваю грамадзянскую пазіцыю, вёў сацсеткі па-беларуску, абараняў членаў Свабоднага аб’яднання спартсменаў — напрыклад, гандбольнага трэнера Канстанціна Якаўлева.
Данілевіч любіць спорт. Адна з яго аддушын — веславанне, на якое ён падсаджваў усіх знаёмых. У Аляксандра некалькі каякоў.
Не так даўно ён таксама захапіўся лыжамі і лыжаролерамі.
Але, канечне, асноўную частку яго жыцця займала любімая праца. Данілевіч — вядомы і паспяховы адвакат. Спецыялізуецца на прадстаўленні інтарэсаў кліентаў у міжнародным камерцыйным арбітражы.
Ëн лаўрэат прэміі «Феміда» у намінацыі «Трацейскі суд» — найвышэйшай грамадскай юрыдычнай узнагароды ў Беларусі, заснаванай Беларускім саюзам юрыстаў (2016 г.). Аўтар раздзелаў «Міжнароднае прыватнае права. Беларусь» і «Спартовае права. Беларусь» у Сусветнай энцыклапедыі. Добра валодае не толькі беларускай і рускай мовамі, але і англійскай, французскай, італьянскай.
Адным са знакамітых кліентаў яго адвакацкага бюро ў Беларусі з’яўляецца футбольны клуб «Крумкачы».
Чытайце таксама:
Як беларусаў катуюць на Акрэсціна — сведчанні зняволеных, экс-супрацоўніка ІЧУ, развагі гісторыка ў фільме «НН»
Папулярны тыктокер з Расіі тусіць у дарагіх рэстаранах Мінска: «Быццам бамжу падалі. Жарыце, на здароўе»18
Каментары