Жанчына, якой сусед-дачнік адсек чатыры пальцы, расказала, як цяпер аднаўляе здароўе
Здарэнне адбылося ў снежні 2024 года. На Галіну з сякерай напаў сусед-дачнік — пабіў цела і адсек пальцы. Жанчына перажыла аперацыю на руцэ і цяпер аднаўляе як фізічнае, так і ментальнае здароўе, расказала яна ў эфіры АНТ.
Галіна Асядоўская — старшыня садаводчага таварыства «Антонаўка 1957», які ў Мінскім раёне каля Шчомысліцы.
Да аднаго з жыхароў таварыства, 60-гадовага мужчыны, у Галіны былі пытанні: яго даўгі за электрычнасць, ваду і працу лічыльнікаў цягнуліся з 2009 года.
«12 снежня 2024 гэты мужчына прыйшоў да мяне з сякерай і спрабаваў мяне забіць. Прыйшоў злы, запатрабаваў тэлефон электрыкаў, таму што за гадзіну да гэтага мы адключылі яму электраэнергію. Ён уварваўся да мяне ў дом, стаў мяне біць, я ўбачыла, што ў яго ёсць сякера», — распавяла Галіна.
Мужчына граміў у доме Галіны мэблю, тэхніку, ноўтбук. Потым пачаў біць саму жанчыну — абухом сякеры.
«Памятаю, як ён мяне біў, і жудасны страх. У адзін момант я зразумела, што гляджу ў сваю магілу, калі ён навісаў нада мной з сякерай. Я разумела, што гэта нейкі трылер са мной у галоўнай ролі, і што ён цяпер адсячэ мне галаву», — успамінае яна.
Сусед пакінуў Галіне страсенне мозгу, вялікую страту крыві, зламаную лапатку, велізарную колькасць сінякоў па ўсім целе і адсечаныя пальцы на правай руцэ — тры цалкам і адзін напалову. Іх Галіна змагла сабраць падчас нападзення, што дапамагло ёй пасля.
Крыкі жанчыны пачуў іншы сябар таварыства, які акурат у гэты час прыехаў на дачу з Мінску. Ён яе і выратаваў.
Пацярпелую шпіталізавалі. У НПЦ хірургіі, транспланталогіі і гематалогіі некалькі брыгад лекараў 14 гадзін прышывалі ёй пальцы. Адзін з іх не атрымалася захаваць, астатнія прыжываюцца.
Цяпер Галіна прымае антыдэпрэсанты і спрабуе перажыць тое, што адбылося. Супраць мужчыны, які напаў на яе, распачата крымінальная справа.
У бальніцы жанчына думала, ці зможа яна далей быць старшынёй таварыства, і вырашыла, што «не можа дазволіць гэтаму чалавеку і тым, хто на яго баку, перамагчы».
«У сына на тэлефоне былі налепленыя сцяг і герб Расіі. З гэтага ўсё пачалося». Бацька школьніка з Баранавіч расказаў, як яго сына цкавалі аднакласнікі40
Каментары
Паказалі ж на АНТ. А ўвогуле, такія выпадкі, на вялікі жаль, не рэдкасць.