Двое грамадзян ЗША, якія ваююць ва Украіне на баку УСУ, зніклі пад Харкавам прыкладна тыдзень таму і не выходзяць на сувязь. Ёсць падазрэнні, што яны патрапілі ў палон, паведамляе CNN.
39-гадовы Аляксандр Друке і 27-гадовы Эндзі Х'юн былі ў складзе 92-й механізаванай брыгады УСУ і зніклі падчас бою каля Збіцкага пад Харкавам 9 чэрвеня. Іх пошукі ні да чаго не прывялі.
Група Task Force Baguettе, якая складаецца з замежных добраахвотнікаў, якія ваююць на баку УСУ, заявіла, што двух амерыканцаў узялі ў палон расійскія войскі.
«З таго часу мы нічога пра іх не чулі. Інфармацыя была пацверджаная ўкраінскай выведкай», — гаворыцца ў паведамленні групы.
Але самога моманту захопу ў палон ніхто на свае вочы не бачыў.
Прэс-сакратар Дзярждэпартамента ЗША Нед Прайс заявіў, што ЗША ў курсе «непацверджаных паведамленняў аб узяцці ў палон двух грамадзян ЗША».
«Мы ўважліва сочым за сітуацыяй і знаходзімся ў кантакце з украінскімі ўладамі. Мы ўстрымаемся ад далейшых каментароў з меркаванняў прыватнасці», — цытуе CNN Прайса.
Вядома, што Аляксандр Друке родам са штата Алабама. Па словах сваякоў, раней ён служыў у Іраку. Эндзі Х'юн нарадзіўся ў Каліфорніі, служыў у марской пяхоце ЗША.
Сітуацыя тым больш трывожная, што на мінулым тыдні трох узятых у палон замежных байцоў УСУ прысудзілі да смяротнага пакарання ў самаабвешчанай «ДНР». Іх абвінавацілі ў наёмніцтве і спробах гвалтоўнага захопу ўлады.
Цяпер чытаюць
Героя тэлефонных зліваў палкоўніка Кісяля, які заклікаў калечыць дэманстрантаў, раптоўна апусцілі на раённы ўзровень5
Каментары