У Пцічы патанула шасцігадовае дзіця, а ў Нёмане — трынаццацігадовы падлетак
Двое дзяцей утапілася ў рэках Беларусі 28 чэрвеня. У Пухавіцкім раёне на рацэ Пціч патануў шасцігадовы хлопчык, а ў Мастоўскім раёне на Нёмане — трынаццацігадовы падлетак. Дзіця адпачывала на беразе вадаёма з бацькамі, але яны не паспелі зрэагаваць на тое, што адбылося,
Як паведамляе прэс-служба Следчага камітэта, увечары ў аўторак шасцігадовы малы адпачываў разам з бацькамі паблізу ракі Пціч. Яны купаліся, пры гэтым хлопчык быў у выратавальнай камізэльцы. Праз некаторы час дзіця зняло камізэльку, надзела маску для плавання і нырнула, пасля чаго знікла.
Бацькі кінуліся на пошукі, але выратаваць хлопчыка не змаглі. Яго цела дасталі з вады супрацоўнікі МНС.
Іншы сённяшні выпадак адбыўся на Нёмане ў Мастоўскім раёне. Там на вачах у сяброў і рыбакоў патануў 13-гадовы хлопчык. Цяпер яго цела шукаюць работнікі Таварыства выратавання на водах і МНС, паведамляе прэс-служба Следчага камітэта.
Па папярэдніх звестках, падлетак знаходзіўся на беразе разам са сваімі сябрамі. У нейкі момант ён пайшоў плаваць, аднак неўзабаве пачаў тапіцца. Выратаваць яму жыццё паспрабавалі рыбакі, якія знаходзіліся побач у момант трагедыі, аднак не паспелі — падлетак схаваўся пад вадой.
Месца, дзе патануў хлопец, не было прызначана для купання.
Каментары