Вучыч прывёў у прыклад беларускую роўнасць рэгіёнаў і паставіў Барысаў у адзін шэраг з Мінскам
Прэзідэнт Сербіі Аляксандр Вучыч назваў Беларусь прыкладам краіны з раўнамерным эканамічным развіццём. Паводле яго слоў, абласныя цэнтры і нават раённы Барысаў фінансуюцца і развіваюцца там нароўні са сталіцай.
Як паведамляе партал Radiosarajevo, адпаведную заяву сербскі лідар зрабіў падчас праверкі будаўніцтва новай транспартнай магістралі.
Вучыч падкрэсліў неабходнасць скараціць разрыў ва ўзроўні жыцця паміж сербскімі гарадамі і дасягнуць таго, каб сярэдні заробак ва ўсіх рэгіёнах краіны быў не ніжэйшым за 1000 еўра.
Ён адзначыў, што цяпер у Бялградзе гэты паказчык складае 1380—1400 еўра, у той час як у правінцыі ён значна меншы (напрыклад, у горадзе Сомбар — толькі 864 еўра).
Каб праілюстраваць важнасць аднолькавага развіцця тэрыторый, Вучыч згадаў беларускі вопыт размеркавання рэсурсаў.
«У іх заўсёды былі Брэст, Гродна, Віцебск, Магілёў, Гомель, Барысаў і Мінск — і ўсе яны раўнамерна развітыя. Што атрымліваюць адны, тое ж атрымліваюць і другія. У нас жа Бялград і Нові-Сад моцна адарваліся наперад. Цяпер Ніш паступова даганяе, Крагуевац таксама, але нам трэба яшчэ вельмі шмат працаваць над іншымі гарадамі і акругамі», — працытавала прэзідэнта Сербіі выданне.
Між тым, уяўленне сербскага лідара пра тое, што сталіца і рэгіёны ў Беларусі атрымліваюць аднолькава, абвяргаецца афіцыйнай статыстыкай. Паводле даных Белстата, сярэднямесячная зарплата ў Барысаўскім раёне за 2025 год склала 2 407 рублёў. Нават у самым прыбытковым снежні мінулага года яна дасягнула толькі 2 725 рублёў. У той жа час сярэдні заробак у Мінску ў тым жа месяцы склаў 4 290 рублёў, перавысіўшы барысаўскі паказчык больш чым у паўтара раза.
Каментары