У Расіі сыход замежных кампаній хочуць кампенсаваць працай зняволеных
Папраўчыя калоніі могуць «заняць месца ІКЕА» ў Расіі: яны, маўляў, прапануюць лепшую якасць мэблі па больш нізкай цане. Пра гэта на выставе прадукцыі Федэральнай службы выканання пакаранняў у Екацярынбургу заявіў начальнік аддзела працоўнай адаптацыі асуджаных Галоўнага ўпраўлення Федэральнай службы выканання пакаранняў Расіі па Свярдлоўскай вобласці Іван Шаркоў, ягоныя словы цытуе мясцовая прэса, піша Радыё Свабода.
Начальнік рэгіянальнага ГУФСВП Аляксандр Фёдараў пайшоў яшчэ далей і заявіў, што вытворчасцю папраўчых калоній можа замяніць прадукцыю і іншых замежных кампаній, якія пайшлі з рынку.
«Тавараабарот і колькасць занятых на вытворчасці людзей год ад года растуць», — цытуе яго выданне.
Праваабаронцы шмат разоў крытыкавалі працу зняволеных у Расіі, называючы яе прымусовай і фактычна дармавой.
«Прымусовая праца зняволеных у невыносных, прыніжаючых чалавечую годнасць умовах — рэальнасць расійскіх калоній», — адзначаў у 2021 годзе праваабарончы цэнтр «Мемарыял».
Рэчаіснасць беларускіх калоній у гэтым плане калі і розніцца, то хіба толькі ў горшы бок.
Каментары