Журналістцы Ірыне Слаўнікавай прысудзілі 5 гадоў калоніі — на год больш, чым прасіў пракурор
Яе прызналі вінаватай у «стварэнні экстрэмісцкага фармавання» і ўдзеле ў пратэстах.
Працэс праходзіў у Гомелі ў закрытым рэжыме больш за месяц. Яго ўзначальваў Мікалай Доля, які разглядаў і «справу Ціханоўскага». Пракурор прасіў чатыры гады зняволення.
Ірына Слаўнікава і яе муж Аляксандр Лойка былі затрыманыя 30 кастрычніка 2021 года ў аэрапорце Мінска, калі вярталіся з адпачынку. Першапачаткова пара была асуджаная на 15 сутак арышту за «публікацыю ў Фэйсбуку экстрэмісцкага кантэнту».
Гаворка ішла пра матэрыялы «Белсата» перыяду, калі тэлеканал яшчэ не быў прызнаны экстрэмісцкім. Суткі скончыліся, але ні мужа, ні жонку не адпусцілі. Іх прывезлі ў іншае РУУС, дзе яны пачулі, што зноў затрыманыя — нібыта «за дробнае хуліганства». І зноў ім далі па 15 сутак арышту. 26 лістапада 2021 года журналістку прызналі падазраванай па крымінальнай справе, а затым перавялі ў следчы ізалятар №1 у Мінску.
Ірыне першапачаткова было выстаўленае абвінавачванне паводле артыкула 342 КК РБ, частка 1 — «арганізацыя групавых дзеянняў, якія груба парушаюць грамадскі парадак ці ўдзел ў іх».
Каментары