Ва Украіне засталася толькі адна вобласць, у якую за час вайны ні разу не «прылятала»
Першы намеснік міністра ўнутраных спраў Украіны Яўген Енін у ранішнім эфіры нацыянальнага тэлемерафона 7 жніўня паведаміў, што з пачатку вайны толькі ў адну вобласць Украіны не было прылётаў. Гэтая вобласць — Чарнавіцкая.
«Калі казаць пра тыя вобласці, якія пакутуюць ад расійскіх снарадаў больш за ўсё, то гэта Данецкая, якую абстралялі больш за 3 тысячы разоў, Луганская — 4 тысячы разоў, Мікалаеўская была абстраляная 700 разоў. Застаецца адна-адзіная вобласць, у якую, дзякуй Богу, пакуль не прылятала, гэта Чарнавіцкая вобласць», — паведаміў Енін.
Чарнавіцкая вобласць — самая маленькая па тэрыторыі ва Украіне. Яна мяжуе з Румыніяй, краінай НАТА. Да Другой сусветнай вайны яе тэрыторыя (гістарычна-культурны рэгіён Паўночная Букавіна), дарэчы, у склад Румыніі і ўваходзіла, да сённяшняга дня каля 20% насельніцтва там складаюць малдаване і румыны.
Каментары