Галоўчанка: У Беларусі няма абмежаванняў на прыём даляраў старога ўзору
Пра гэта заявіў журналістам старшыня праўлення Нацыянальнага банка Раман Галоўчанка, піша БелТА.
«Магу з усёй адказнасцю заявіць, што ў палітыцы валютна-абменных аперацый з фізічнымі асобамі ніякіх абмежаванняў ці зменаў не ўводзілася, не ўводзіцца і ўводзіцца не будзе. У нас няма ніякіх інструкцый або абмежаванняў па прыёме тых ці іншых даляравых купюр у залежнасці ад года выпуску.
У абароце знаходзяцца і тыя, і іншыя. Банкі абавязаны прымаць і прымаюць купюры любога ўзору, калі яны з’яўляюцца плацежаздольнымі, то бок валодаюць прыкметамі плацежаздольнасці», — сказаў Раман Галоўчанка.
Усе банкі працуюць паводле правілаў, прадугледжаных падпісаным імі пад эгідай Асацыяцыі беларускіх банкаў пагадненнем аб выкарыстанні адзінага пераліку прыкмет плацежаздольнасці банкнот у замежнай валюце, у межах якога патрабаванні да прыёму долараў ЗША з’яўляюцца аднолькавымі.
«Гэта пагадненне было накіравана не толькі на ўніфікацыю патрабаванняў, але і на тое, каб зрабіць іх больш «лайтовымі». Каб яны не былі празмернымі. Вядома, ёсць такі сегмент, як пашкоджаныя купюры, якія не маюць прыкмет плацежаздольнасці. Раней гэтай праблемы ўвогуле не існавала з-за таго, што банкі маглі абменьваць такую валюту за мяжой на новыя купюры. Цяпер гэта з вядомых прычын ускладнена. Тым не менш магу паведаміць, што Беларусбанк нядаўна аднавіў аперацыі па прыёме пашкоджаных купюр на інкаса, то бок на абмен на непашкоджаныя. Але, натуральна, гэта паслуга платная, і прадугледжана пэўная камісія», — адзначыў старшыня праўлення Нацбанка.
Калі няма дэфектаў і пашкоджанняў, для банкаў няма розніцы паміж даляравымі купюрамі старога і новага ўзору, падкрэсліў ён.
«Калі ўзнікаюць нейкія пытанні, яны найчасцей звязаныя з так званым чалавечым фактарам. Але Нацыянальны банк вельмі ўважліва адсочвае гэтую сітуацыю літаральна штодзённа, дае адпаведныя ўстаноўкі банкам. Працуе кол-цэнтр, куды можна скіроўваць пытанні і магчымыя скаргі. Але ў цэлым праблема не носіць сістэмнага характару», — заявіў Раман Галоўчанка.
Старшыня праўлення Нацбанка нагадаў, што яшчэ на пасадзе прэм’ер-міністра ён рэкамендаваў захоўваць зберажэнні ў нацыянальнай валюце.
«Зараз магу прывесці канкрэтныя лічбы, якія пацвярджаюць правільнасць маіх слоў. Калі год таму чалавек паклаў на дэпазіт 1000 рублёў, цяпер ён зарабіў 120 рублёў. А той, хто набыў у той самы час долары ЗША і паклаў іх пад падушку, страціў 20 рублёў. Матэматыка зразумелая. Лічбы красамоўныя, гавораць самі за сябе», — падсумаваў ён.
Каментары
Для него может и нет, а простому человеку, надо пройти 3-4 обменника и желательно разных банков, пока примут !