За «няправільны» каментарый пра Лукашэнку палітвязня ў Віцебску асудзілі на паўтара года калоніі
Праваабаронцы даведаліся пра вынікі судовага разбіральніцтва па справе палітзняволенага Аляксея Мацявіна, якога абвінавачвалі паводле арт. 368 КК (за абразу Лукашэнкі). Справу разглядаў суддзя суда Першамайскага раёна Віцебска Юрый Урбан, піша «Вясна».
Паводле звестак «Віцебскай Вясны», у віну Мацявіну паставілі тое, што ён «супрацьпраўна падрыхтаваў і апублікаваў тэкст з негатыўнай ацэнкай Аляксандра Лукашэнкі, які ўтрымліваў ненарматыўныя формы маўлення», чым публічна яго абразіў.
Свой учынак абвінавачаны патлумачыў тым, што на момант напісання каментарыя ён знаходзіўся ў стане «выбуху негатыўных эмоцый».
12 жніўня суд Першамайскага раёна Віцебска прызнаў Аляксея Мацявіна вінаватым у здзяйсненні злачынства паводле арт. 368, прысудзіўшы яму ў якасці пакарання 1,5 года калоніі з адбыццём ва ўмовах агульнага рэжыму.
Абвінавачанаму 49 гадоў. Вядома, што мужчына нарадзіўся ў Расіі, але ў свой час пераехаў у Беларусь. Скончыў Аршанскае медвучылішча, апошнія 15 гадоў працаваў фельчарам у віцебскай паліклініцы №7. Жанаты, мае 13-гадовае дзіця. Затрымалі Мацявіна 15 ліпеня гэтага года.
«Мае спінагрызы са мной». Ціханоўская расказала, што ўжо выбірае для дзяцей школу ў Варшаве12
Каментары