Звесткі пра тое, што былога дэпутата Вярхоўнай Рады ад праўрадавай фракцыі «Слуга народа», які пасля пачатку расійскай акупацыі Херсоншчыны перайшоў на бок ворага і заняў высокую пасаду ў акупацыйнай адміністрацыі, застрэлілі, сталі з'яўляцца ва ўкраінскіх і расійскіх тэлеграм-каналах яшчэ ўчора ўвечары. Цяпер гэта афіцыйна пацвердзіў расійскі Следчы камітэт, піша «РИА Новости»
Цела калабаранта з агнястрэльным раненнем у галаву знайшлі ў яго доме ў горадзе Голая Прыстань на Херсоншчыне. Побач ляжала помпавая стрэльба «Мосберга», якая афіцыйна была зарэгістраваная на самога Аляксея Кавалёва. Хто страляў — высвятляюць.
Таксама нажом у шыю была параненая 38-гадовая каханка Кавалёва, яна была шпіталізаваная, а пасля памерла ў бальніцы.
Па папярэдніх звестках, напад адбыўся ўчора недзе каля 15-й гадзіны.
Калі пачалася агрэсія Расіі супраць Украіны, народны дэпутат Кавалёў знаходзіўся ў Кіеве, але пасля атрымання весткі пра акупацыю Херсоншчыны накіраваўся дахаты. Спачатку ён запэўніваў, што не супрацоўнічае з акупантамі, а працуе ў сваёй акрузе, кіруючыся ўкраінскім заканадаўствам, але на пачатку чэрвеня скінуў маску і адкрыта заявіў, што Расія тут назаўсёды і ён звязвае з ёй уласную будучыню і будучыню рэгіёна.
Пасля таго Кавалёў быў прызначаны акупантамі на пасаду намесніка старшыні прарасійскага ўрада Херсонскай вобласці па пытаннях сельскай гаспадаркі. Да дэпутацтва ён быў тут паспяховым фермерам.
Каментары