Археолагі знайшлі на поўдні Грузіі, у сяле Аразмані Дманіскага раёна за 100 км ад Тбілісі, чалавечы зуб узростам 1,8 млн гадоў. Пра гэта паведамляе Reuters.
«Археолагі ў Дманісі выявілі вырабленыя найстаражытнейшымі насельнікамі Еўразіі прылады працы, якія датуюцца 1,8 млн гадоў. < … > Міжнародная археалагічная экспедыцыя выявіла ў пластах [глебы], датаваных 1,8 млн гадоў, зуб ніжняй сківіцы homo, чацвёрты прэмаляр», — сказана ў паведамленні на старонцы мясцовай мэрыі ў фэйсбуку.
Знаходка ў Аразмані даказвае, што гэтая мясцовасць была адным з найстаражытнейшых арэалаў пражывання старажытнага чалавека за межамі афрыканскага кантынента.
У мэрыі таксама адзначаюць, што археалагічныя раскопкі ў Аразмані праходзілі і ў 2021 годзе. Тады навукоўцы таксама выявілі каменныя прылады, вырабленыя гома эрэктусам, а таксама парэшткі жывёл.
Увогуле ж Дманісі знаходзіцца ў цэнтры ўвагі археолагаў з пачатку 2000-х гадоў. Тады былі знойдзеныя парэшткі, якія таксама датуюцца 1,8 млн гадоў. Грузінскія навукоўцы вызначылі, што яны належаць старажытным мужчыну і жанчыне. Ім былі падабраныя сімвалічныя імёны Зезва і Мзія.
Самыя старажытныя ў свеце знойдзеныя на гэты час чалавечыя парэшткі датуюцца ўзростам 2,8 млн гадоў, знайшлі іх у Эфіопіі.
Каментары