Расійскія войскі цалкам абясточылі Запарожскую атамную электрастанцыю. Сістэмы жыццезабеспячэння АЭС сілкуюцца ад дызель-генератараў. Пра гэта са спасылкай на НАЭК «Энергаатам» перадае «Укрінфарм».
Паводле інфармацыі ўкраінскага «Энергаатама», з-за абстрэлу расійскімі войскамі пашкоджаныя і адключаныя лініі сувязі Запарожскай АЭС з энергасістэмай.
«Сёння ноччу ў 00:59 з-за чарговага абстрэлу расійскімі войскамі была пашкоджаная і адключылася апошняя лінія сувязі з энергасістэмай 750кВ ЗАЭС — Дняпроўская. У выніку адбылося поўнае абясточванне Запарожскай АЭС. У аўтаматычным рэжыме ўключыліся дызель-генератары», — гаворыцца ў паведамленні «Энергаатаму».
У «Энергаатаме» дадаюць, што наяўных запасаў дызельнага паліва для іх працы ў такім рэжыме хопіць на 10 сутак, таму патрабуецца рамонт і аднаўленне працы ліній сувязі ЗАЭС з энергасістэмай.
У кампаніі таксама адзначаюць, што планы ўключэння энергаблокаў ва ўмовах абстрэлаў і пашкоджанні ўсіх ліній нерэальныя.
Каментары