Падчас саміту Асацыяцыі краін Усходняй Азіі ў Камбоджы прэм'ер-міністр Кітая Лі Кэцян падкрэсліў безадказнасць пагроз прымянення ядзернай зброі, даўшы зразумець, што Пекін незадаволены ядзернай рыторыкай свайго стратэгічнага партнёра, піша Бі-бі-сі.
Як паведаміў высокапастаўлены прадстаўнік адміністрацыі ЗША, кітайскі прэм'ер гаварыў даволі падрабязна пра палітыку Кітая ў дачыненні да Украіны.
«Лі Кэцян зрабіў выразны акцэнт на суверэнітэце, на безадказнасці ядзерных пагроз, неабходнасці забеспячэння таго, каб ядзерная зброя не выкарыстоўвалася так, як намякалі некаторыя», — распавёў на ўмовах ананімнасці амерыканскі чыноўнік.
Захад абвінавачваў Расію ў безадказных заявах аб магчымым прымяненні ядзернай зброі з моманту яе лютаўскага ўварвання ва Украіну.
Масква, у сваю чаргу, абвінаваціла Захад у «правакацыйнай ядзернай рыторыцы».
Афіцыйны прадстаўнік ЗША сказаў, што «ў Пекіне несумненна быў некаторы дыскамфорт з нагоды таго, што мы бачылі ў плане безразважнай рыторыкі і актыўнасці з боку Расіі», нягледзячы на тое, што фармальна Масква з'яўляецца партнёрам Кітая.
«Я думаю, таксама бясспрэчна, што Кітай, верагодна, адначасова здзіўлены і нават трохі збянтэжаны ходам расійскай ваеннай аперацыі», — сказаў чыноўнік.
У панядзелак у рамках Усходнеазіяцкага саміту пройдзе сустрэча прэзідэнта ЗША Джо Байдэна з кітайскім лідарам Сі Цзіньпінам.
Расійскую дэлегацыю на саміце ўзначальвае міністр замежных спраў Сяргей Лаўроў.
Каментары