Прэзентацыя аўтобусаў МАЗ у Хабараўску правалілася. «Разы ў два цану трэба зніжаць»
У Хабараўску прэзентавалі апошнюю мадыфікацыю беларускага аўтобуса завода МАЗ. «Прэзентацыя яго правалілася. Цана транспарту была вышэйшая за цану кітайскіх аналагаў амаль у два разы», — піша DVHAB.ru. Акрамя таго, памер аўтобусаў не падыходзіць для вуліц горада.
Заваёўваць Далёкі Усход складаней, чым Санкт-Пецярбург ці іншы заходні рэгіён, піша выданне, бо супрацьлеглы край Расіі вельмі цесна супрацоўнічае з Кітаем. Таму там і выбар большы, і цэны ніжэйшыя. І тым не менш МАЗ спробу зрабіў.
Прывезлі абноўленую мадэль «МАЗ-203». Але, нягледзячы на добрыя параметры, хабараўцаў не задаволіла цана — 15 мільёнаў. Бонусам — субсідыі сумесна з Мінпрамторгам Беларусі, выходзіць эканомія да паўтара мільёна рублёў.
Тыя прадпрымальнікі, якія карыстаюцца МАЗамі, скардзяцца на тое, што камплектуючыя вымушаны чакаць доўга.
— У нашага перавозчыка ІП Шадуя ёсць іншыя аўтобусы гэтага вытворцы. І камплектуючыя яна вымушаны чакаць не адзін тыдзень, а гэта страты. Таму пытанне з абслугоўваннем стаіць востра, — выказаўся Уладзімір Ашчаноўскі, начальнік упраўлення прамысловасці, сувязі і транспарту.
Але галоўнае, прадпрымальнікаў збянтэжыла цана. У мінулым месяцы адзін з мясцовых перавозчыкаў заключыў кантракт з кітайскім заводам, і там сярэдняя цана транспарту склала восем мільёнаў рублёў — у два разы менш.
— Вельмі шмат залежыць ад цаны. Цяпер яна вельмі завышана — разы ў два яе трэба зніжаць. А так аўтобус цікавы. Хоць і камплектуючыя таксама бянтэжаць. Сказалі, што тэрміны мінімальныя, а потым акажацца, што і месяц давядзецца чакаць пастаўкі.
Высветлілася, што і памер аўтобуса не падыходзіць да вуліц горада — вельмі доўгія, «патрэбныя карацейшыя на метр-два, а то і два з паловай». Бо ў Хабараўску павароты ў цэнтры горада вельмі крутыя.
У Хабараўску штогод адбываецца абнаўленне аўтобусаў для перавозу пасажыраў. На бягучы момант, як запэўнівае мэрыя, у горадзе каля 30 працэнтаў грамадскага транспарту з тэрмінам эксплуатацыі больш за сем гадоў. Аднак з 2026 года пад забаронай акажуцца ўсе аўтобусы старэйшыя за дзесяць гадоў.
Беларускі «МАЗ-203» зараз дэманструецца транспартным перавозчыкам па ўсёй Расіі. Прагон стартаваў ад Масквы, пабываў аўтобус ва Улан-Удэ і ў Благавешчанску, даехаў да Хабараўска. На наступным тыдні «МАЗ-203» адправіцца ва Уладзівасток.
-
«Мая праца згарэла». Беларускія бізнэсы страцілі тавар на складах Wildberries, але маюць больш шанцаў на кампенсацыю, чым расіяне
-
20 літраў у бак і ніякіх каністраў? Ці сапраўды на беларускіх запраўках на мяжы з Расіяй увялі ліміты на бензін
-
Кітайскі стартап выпусціў ШІ-мадэль, якая абышла амерыканскія аналагі
Каментары