Скручваюць прабегі, робяць «памылкі» ў VIN і годзе выпуску. Як не даць сябе падмануць пры куплі патрыманага аўто

Карэкціроўцы паддаюцца 99% аўтамабіляў

Адным з галоўных паказчыкаў, які ўплывае не толькі на стан аўтамабіля, але і на ягоны кошт, з'яўляецца прабег. Праз гэта паказчыкі адометра нярэдка падвяргаюцца карэкціроўцы. Нягледзячы на тое, што гэта відавочны падман, аказанне такіх паслуг з'яўляецца законным.

Павялічыць

Карэкціроўцы паддаюцца 99% мадэлей аўтамабіляў. Галоўнае — знайсці адпаведнага спецыяліста і быць гатовым яму за гэта заплаціць.

Кошт паслуг па «амаладжэнні» залежыць ад маркі і мадэлі аўтамабіля, а таксама ад глыбіні ачысткі інфармацыі. Цэны на такія паслугі пачынаюцца з 20 даляраў і даходзяць да некалькі сотняў. Для многіх машын на выбар дасяжныя два варыянты скруткі прабегу — бюджэтны, калі паказчыкі змяняюць толькі на адометры, і больш дарагі, калі даныя аб прабегу змяняюць ва ўсіх электронных блоках, дзе захоўваецца інфармацыя.

Павялічыць

Атрымліваецца, што калі прадавец вырашыў сэканоміць на скрутцы, то, звярнуўшыся па дапамогу да спецыялістаў па камп'ютарнай дыягностыцы, у вас атрымаецца даведацца праўду.

Калі ж прадавец абраў варыянт «глыбокага амаладжэння», то даведацца пра сапраўдны стан, прынамсі, электронным шляхам, будзе немагчыма. 

Адсюль вынікае, што камп'ютарная дыягностыка хоць і карысны спосаб засцерагчы сябе пры куплі аўто, але далёка не 100%-ны варыянт абароны. Тым не менш, адмаўляцца ад такога спосабу праверкі не варта, паколькі акрамя арыгінальнасці прабегу дыягностыка дапаможа праверыць мноства іншых паказчыкаў, асабліва калі гаворка ідзе пра аўто, не старэйшыя за 10—15 гадоў.

Павялічыць

Што датычыць прабегу, спецыялісты сцвярджаюць, што прасцей за ўсё бясследна «скруціць» яго можна ў аўтамабілях японскіх вытворцаў, канцэрна GM, а таксама ў бюджэтніках расійскай вытворчасці. Складаней за ўсё ідуць справы са свежымі Volvo.

Таксама майстры па карэкціроўцы прабегу адзначаюць, што сярод перакупаў папулярна запускаць чуткі, нібыта ў свежых аўтамабілях прабег адкруціць немагчыма, таму ён абавязкова павінен быць «родны». Спецыялісты ж сцвярджаюць адваротнае: нягледзячы на папулярныя міфы, як «свежыя» BMW, так і VAGі з электроннымі прыборнымі панэлямі паддаюцца карэкціроўцы прабегу.

Як яшчэ можна праверыць арыгінальнасць прабегу?

Праверыць праўдзівасць паказчыкаў адометра можна не толькі пры дапамозе камп'ютарнай дыягностыкі. Даныя аб прабегу аўтамабіля часцяком трапляюць адразу ў некалькі баз даных. Напрыклад, калі аўтамабіль абслугоўваўся ў афіцыйнага дылера, то ў яго базе застаецца інфармацыя аб усіх візітах, праведзеных рамонтах і прабегу на момант звароту ў сэрвіс. Замовіць падобную справаздачу можна, напрыклад, на сайце ka.by, там жа можна праверыць гісторыю аўтамабіляў, набытых на аўкцыёне ў Еўропе. (Па даных стваральнікаў сэрвісу, больш за траціну аўто, прывезеных з Еўропы ў Беларусь, прадаюць са скручаным прабегам).

Таксама прададзеныя на еўрапейскіх аўкцыёнах аўто можна бясплатна праверыць на сайце vf.vin, убіўшы ў радок пошуку VIN-нумар. Калі аўтамабіль прададзены праз аўкцыён, то вы ўбачыце дату продажу, яго фота на момант рэалізацыі і актуальныя даныя прабегу.

Павялічыць

Апроч гэтага, праверыць гісторыю аўто з Еўропы можна, купіўшы платную справаздачу ад carvertical.

Як праверыць аўто з ЗША?

Калі гаворка ідзе пра аўтамабіль, набыты на аўкцыёне ў ЗША, то даведацца пра яго стан на момант продажу можна, проста ўвёўшы VIN у пошукавіку.

Важна: сайты, якія захоўваюць падобную інфармацыю, гэта ў першую чаргу бізнэс. Таму за пэўную плату (400—600$) прадавец можа выдаліць усю інфармацыю з інтэрнэту. Калі вы набываеце машыну з ЗША і пры ўводзе нумара кузава вам не выдае ніякай інфармацыі аб канкрэтным аўто, можаце быць на 99% упэўненым, што аўтамабіль «адбялілі».

Павялічыць

Праверыць гісторыю таксама можна, купіўшы справаздачу Carfax. Яна захоўвае даныя аб колькасці ўладальнікаў, візітах на СТА, наяўнасці аварыйнага мінулага і г.д. Фота аўтамабіля да аднаўлення вы ў ёй не ўбачыце, але затое будзеце ведаць, якая частка машыны пацярпела пры ДТЗ, а таксама ці не з'яўляецца аўтамабіль «тапляком».

Адзначым, што чым старэйшы аўтамабіль, тым складаней праверыць арыгінальнасць паказанняў адометра. Прабегі памяншаюць не толькі ў свежых аўтамабілях, але і ў досыць узроставых. За сваю гісторыю эксплуатацыі ў Беларусі адна і тая ж машына можа прайсці працэдуру «амаладжэння» не адзін раз.

Праверка гісторыі ў Беларусі і РФ

Праверыць гісторыю аўтамабіляў, якія доўга эксплуатуюцца ў Беларусі ці РФ, можна праз платны сэрвіс av.by/vin. Справаздача змяшчае інфармацыю аб аўто, якія калі-небудзь былі зарэгістраваныя не толькі ў Беларусі, але і Расіі. Што не малаважна, сэрвіс ад av.by дапаможа знайсці старыя аб'явы аб продажы аўто на сайце (калі раней прадавец паказваў праўдзівы VIN).

Павялічыць

Наўмысна ўказваюць фальшывы VIN 

Як бачым, маючы VIN-нумар, мы можам атрымаць даволі шмат інфармацыі пра аўтамабіль, не ўстаючы з канапы. Натуральна, што аб гэтым выдатна ведаюць нядобрасумленныя прадаўцы, таму часам яны наўмысна пазначаюць у аб'яве VIN-нумар з памылкай альбо бяруць яго ад падобнага аўто з празрыстай гісторыяй. Каб не згубіцца на гэтым моманце, прасіце даслаць фота тэхпашпарта альбо самога нумара на кузаве аўтамабіля.

«Памыляюцца» ў апісанні года выпуску

Акрамя маніпуляцый з прабегам, прадаўцы часта пазначаюць у аб'яве не адпаведны рэальнаму год выпуску аўтамабіля. Гэта робіцца як для таго, каб пакупнік, які абмяжоўвае ўзрост аўто ў параметрах пошуку, мог убачыць яго аб'яву, так і для спробы прадаць аўто пад выглядам больш свежага. Як правіла, такія несастыкоўкі пакупнік заўважае толькі падчас агляду аўто ўжывую альбо ўжо падчас перарэгістрацыі ў ДАІ. Таму, каб не патрапіць у непрыемную сітуацыю, заўсёды ўдакладняйце, які год выпуску пазначаны ў тэхпашпарце.

Дарэчы, па такой жа схеме адбываецца і падман з прабегам. Часам прадаўцы могуць паказаць у аб'яве меншы прабег, чым ёсць на адометры. Як і ў выпадку з указаннем фальшывага ўзросту, гэта дапамагае ім праходзіць пад больш прывабныя паказчыкі пры пошуку аб'яваў. Часам такія маніпуляцыі бачныя падчас прагляду фота, калі выяўляецца, што пазначаны прабег у апісанні злёгку меншы, чым адлюстроўваецца на шчытку прыбораў.

Чытайце таксама: 

Хутка купляць і прадаваць аўтамабілі трэба будзе па новых правілах. Што зменіцца?

• 6
• 0
• 0
• 5
• 1
• 3
• 6
• 0