Сёння ў Полацку адбыўся новы суд па скайпе над кандыдатам філасофскіх навук Ігарам Бортнікам, яго асудзілі ў дадатак да ранейшых 23 яшчэ на 15 сутак арышту.
Гэтым разам Ігара Бортніка асудзілі па артыкуле 19.11 КаАП за знойдзеныя ў яго падпіскі на тэлеканал «Белсат» і Symbal.by на Youtube.
У Ігара Бортніка сур'ёзныя праблемы са здароўем. Некалькі месяцаў да арышту ён праходзіў доўгую і складаную рэабілітацыю пасля не вельмі ўдалай аперацыі па лячэнні міжпазваночнай грыжы. Цяпер яму баліць спіна, сядзець больш за паўгадзіны ён не можа, трэба ўставаць і рухацца.
Больш-менш прыстойны стан удавалася падтрымліваць з дапамогай моцных абязбольвальных, без якіх ён не можа паўнавартасна спаць. Між тым там у яго доступу да іх няма, а перадач для Бортніка не прымаюць ніякіх, нават гігіенічных.
Акрамя таго, вядома, што за кратамі ў пачатку другога адміністрацыйнага тэрміну навуковец перанёс гіпертанічны крыз, бо мае праблемы і з ціскам.
Усё гэта падчас суда называлася і пацвярджалася адпаведнымі даведкамі, але пад увагу суддзёй узята не было. Судзіла Ігара Бортніка гэтым разам суддзя Таццяна Хрыпач. Суд вёўся праз скайп.
Раней таксама паведамлялася, што падчас адбыцця арышту ў Ігара Бортніка забралі 300 рублёў у якасці кампенсацыі за данат на фэйсбуку.
Кандыдат філасофскіх навук з Полацка Ігар Бортнік быў затрыманы 29 сакавіка падчас аблавы на супрацоўнікаў Полацкага гісторыка-культурнага запаведніка. Спачатку яму прысудзілі 10 сутак адміністрацыйнага арышту, пасля — яшчэ 13.
Цяпер чытаюць
Беларусь ужо не толькі пра палітвязняў. З чым Святлана Ціханоўская паехала на адзін з галоўных форумаў па бяспецы ў ЗША і што там рабіў Сяргей Ціханоўскі
Каментары