Борыс Джонсан склаў з сябе дэпутацкія паўнамоцтвы пасля скандалу аб вечарынках на Даўнінг-стрыт
Былы прэм'ер-міністр Брытаніі Борыс Джонсан склаў з сябе паўнамоцтвы дэпутата Палаты грамад брытанскага парламента. Гэта адбылося пасля таго, як ён атрымаў справаздачу па справе аб вечарынках на Даўнінг-стрыт падчас лакдаўну.
У пятніцу Джонсан атрымаў копію яшчэ не апублікаванай справаздачы парламенцкага камітэта, які расследаваў абставіны арганізацыі вечарынак у рэзідэнцыі прэм'ера на Даўнінг-стрыт падчас лакдаўну, уведзенага ў сувязі пандэміяй каранавіруса, нагадвае Бі-бі-сі.
Аўтары даклада, у прыватнасці, прыйшлі да высновы, што Джонсан наўмысна ўводзіў парламент у зман. Сам экс-прэм'ер заявіў, што справаздача «мае шмат недакладнасцяў і што яна прадузятая», а членаў камітэта абвінаваціў у спробе выгнаць яго з парламента.
«Яны да гэтага часу не прывялі ніякіх доказаў таго, што я свядома ці па неасцярожнасці ўвёў Палату грамад у зман», — заявіў ён.
У паказаннях, якія Джонсан даваў камітэту ў сакавіку, ён прызнаў, што ўводзіў парламент у зман, але адмаўляў, што рабіў гэта наўмысна.
Пакінуўшы пасаду прэм'ера летам мінулага года, Джонсан заставаўся дэпутатам ад адной з лонданскіх акруг (Аксбрыдж і Саўт-Райсліп), зараз там павінны прайсці датэрміновыя выбары.
У брытанскі парламент Джонсан быў абраны ў 2001 годзе. Пасля адыходу адтуль, па яго ўласным прызнанні, ён не мае намеру пакідаць палітыку.
Борыс Джонсан узначальваў брытанскі ўрад з 2019 па 2022 год. Падчас яго знаходжання на чале кабінета Брытанія афіцыйна выйшла з ЕС.
Яго адыход з пасады прэм'ер-міністра быў па большай частцы выкліканы скандалам з вечарынкамі на Даўнінг-стрыт, які атрымаў назву «Партыгейт» (Partygate).
Каментары