Раённы шык. Як выглядаюць і колькі каштуюць самыя дарагія кватэры ў раённых цэнтрах
Паглядзелі, па якіх цэнах прадаюць самыя дарагія кватэры ў пяці найбуйнейшых раённых цэнтрах Беларусі.
Бабруйск. «Квадрат» па $2240
Па апошніх звестках, у Бабруйску пражывае больш за 208 тысяч чалавек, што робіць яго самым буйным па насельніцтве раённым цэнтрам Беларусі і адзіным з насельніцтвам больш за 200 тысяч.
Самую дарагую з кватэр, выстаўленых на продаж у Бабруйску, ацанілі ў 130 тысяч даляраў, гэта каля 2240 даляраў за «квадрат».
Столькі просяць за двухпакаёвую кватэру са свежым сучасным рамонтам. Яна цалкам мэбляваная, у спальным пакоі ёсць кандыцыянер. Кватэра знаходзіцца па адрасе вул. Горкага на 15-м паверсе 19-павярховіка 2020 года пабудовы.
Агульная плошча кватэры складае 58 м², жылая — 33.
Кватэра з саўнай
Дзве кватэры ў Бабруйску ацанілі ў 89 000 даляраў.
Адна з іх — пяціпакаёўка з саўнай. Агульная плошча кватэры — 126 м². З улікам вялікай плошчы атрымліваецца па $706 за метр. Гэтая кватэра знаходзіцца на 8-м паверсе 9-павярховага дома 1984 года пабудовы.
У кватэры два санвузлы, у адным з якіх месціцца саўна. У вялікай гасцёўні ёсць камін.
Прадавец апісвае кватэру як унікальнае месца, якое можа стаць ідэальным домам для тых, хто шукае нешта асаблівае.
«Унікальная кватэра з убудаванай саўнай і раскошным інтэр'ерам — гэта месца, дзе раскоша і камфорт зліваюцца разам. Кватэра мае не толькі адно з самых прасторных жылых памяшканняў у горадзе, але і ўласную саўну, дзякуючы якой вы зможаце атрымліваць асалоду ад прыемных працэдур у любую пару года», — гаворыцца ў апісанні.
Баранавічы. No photo
У Баранавічах пражывае 172 150 чалавек. Самая дарагая кватэра ў гэтым райцэнтры прадаецца за 90 тысяч даляраў. Столькі просяць за трохпакаёўку на 89 «квадратаў». Гэта крыху больш за 1000 даляраў за метр. У кватэры тры пакоі плошчай каля 17 м² і кухня на 15,9 м².
Наступную па цане кватэру з выстаўленых на продаж у Баранавічах ацанілі ў 87 тысяч ($809 за м²). Гэта ўжо чатырохпакаёўка з агульнай плошчай 107,6 м². Самы вялікі пакой мае плошчу 34 м².
Як выглядаюць самыя дарагія кватэры Баранавіч знутры — невядома. У аб'явах можна ўбачыць толькі здымкі з планам памяшканняў.
Барысаў. Два паверхі і 240 «квадратаў»
Трэцяе месца па колькасці насельніцтва сярод райцэнтраў займае Барысаў, там, згодна з апошнімі данымі, пражывае 136 409 чалавек.
Самая дарагая кватэра ў Барысаве прадаецца за 95 тысяч даляраў. Двухузроўневая трохпакаёўка мае агульную плошчу ў 240 м², жылую — 145,9 м². Калі пералічыць кошт на квадратны метр, атрымліваецца ўсяго каля $396 за м². Таксама ў кватэры велізарная кухня памерам больш за 30 «квадратаў».
Жытло займае два паверхі з трох дома 2007 года пабудовы. Калі меркаваць па фота, рамонт у доме апошні раз рабілі адразу пасля здачы дома ў эксплуатацыю.
«Два санвузлы, дзве зашклёныя лоджыі, падлога з падагрэвам. Кватэра знаходзіцца ў ціхім раёне з развітой інфраструктурай. Выдатнае транспартнае злучэнне», — гаворыцца ў апісанні да аб'екта.
«Шыкоўна і прасторна»
Наступная па дарагоўлі кватэра ў самым буйным райцэнтры Мінскай вобласці выстаўленая за 79 тысяч даляраў.
Агульная плошча гэтай трохпакаёўкі складае 90 м², жылая — 52 м². Кухня — 12,7 м². Дом дзевяціпавярховы, пабудаваны з цэглы. Сама кватэра знаходзіцца на 5-м паверсе. Прадавец чамусьці вырашыў падкрэсліць, што кватэра знаходзіцца непасрэдна на сярэднім паверсе. Само жытло апісваецца як шыкоўнае і прасторнае.
Праўда, рамонт у кватэры далёка не самы сучасны. Напрыклад, на столі ў ванным пакоі можна ўбачыць касетоны.
Пінск. 150 тысяч даляраў за кватэру ў цэнтры
У сталіцы беларускага Палесся, па апошніх звестках, пражывае крыху больш за 124 тысячы чалавек.
Самая дарагая кватэра ў гэтым горадзе прадаецца за 150 тысяч даляраў. Столькі просяць за двухузроўневую чатырохпакаёўку агульнай плошчай пад 140 «квадратаў».
Другі паверх у гэтай кватэры мансардавага тыпу. Сам дом 2001 года пабудовы знаходзіцца ў цэнтры горада па адрасе вул. Міцкевіча, 3. У кватэры зроблены сучасны рамонт, у памяшканнях маюцца кандыцыянеры.
Кватэра для глыбокага сну
Наступная па дарагоўлі кватэра ў Пінску каштуе ў два разы меней. За 77 тысяч даляраў у гэтым горадзе прадаецца трохпакаёўка з агульнай плошчай 76,4 м².
Сярод іншага ў апісанні да аб'екта пазначылі, што ў спальным пакоі ёсць рулонныя шторы блэкаўт для глыбокага сну.
Мазыр. Трохпакаёўка з чырвонай кухняй
Замыкае пяцёрку лідараў па колькасці насельніцтва сярод раённых цэнтраў горад Мазыр. У ім, па апошніх даных, пражывае 105,3 тысячы чалавек.
Самая дарагая кватэра там прадаецца за 72 тысячы даляраў. Столькі просяць за трохпакаёвую кватэру плошчай 78 м². Кватэра — на другім паверсе 11-павярховага дома 2015 года пабудовы.
«У кватэры выкананы сучасны і якасны рамонт. Застаецца ўбудаваная кухня, варачная панэль, пасудамыечная машына, халадзільнік», — гаворыцца ў апісанні.
Але ацаніць па аб'яве інтэр'еры самай дарагой з выстаўленых на продаж кватэр у Мазыры даволі складана. Прадавец выклаў толькі здымкі кухні, ваннага пакоя і калідора.
Магчымы вывад у нежылы фонд
Наступная па дарагоўлі кватэра ў Мазыры прадаецца ўсяго на 2 тысячы даляраў танней. Роўна ў 70 тысяч «вечна зялёных» ацанілі чатырохпакаёўку плошчай 74 м².
Ацаніць, як выглядае гэтае жытло, па аб'яве зусім немагчыма, бо сярод здымкаў ёсць толькі выява з планам памяшканняў.
У апісанні да аб'екта пазначана толькі тое, што кватэра мае зручнае месцазнаходжанне. Апроч гэтага, адзначаецца магчымасць вываду памяшкання ў нежылы фонд. Сама кватэра знаходзіцца на першым паверсе.
«А што ў вас за праблемы? Далёка да Мінска ці няма каму падвезці?» Публічная пікіроўка Лукашэнкі і Пашыняна13
Каментары
тиханоускаетенестайл
бярыця не глядя, мужыки)