Стралянінай скончылася пагоня за п'яным кіроўцам на аўтадарозе Р—101 «Пружаны — Бяроза», як расказалі ў МУС Беларусі ў панядзелак. Там удакладнілі, што інцыдэнт адбыўся напярэдадні позна ўвечары.
«Інспектары ДАІ Бярозаўскага РАУС падалі сігнал аб спыненні кіроўцу Mercedes. Патрабаванне ён праігнараваў і працягнуў рух, павялічваючы хуткасць. Пачаўся пераслед», — гаворыцца ў паведамленні ведамства.
У МУС падкрэсліваюць, што кіроўца неаднаразова праігнараваў патрабаванне супрацоўнікаў міліцыі спыніцца, а спрабуючы ўцячы, пачаў ствараць рэальную пагрозу жыццю і здароўю іншых людзей.
«Інспектарам давялося зрабіць некалькі папераджальных стрэлаў у паветра, а затым па колах аўто. Толькі так удалося спыніць уцекача», — расказалі ў ведамстве.
Высветлілася, што аўто кіраваў 39-гадовы жыхар Бярозы. Медычны агляд паказаў наяўнасць у яго 1,5 праміле алкаголю. У салоне таксама знаходзіліся нецвярозы 38-гадовы пасажыр (2,1 праміле) і 14-гадовая дачка кіроўцы.
Пры затрыманні, як сцвярджаецца, мужчыны не падпарадкаваліся законным патрабаванням супрацоўнікаў міліцыі, праз што да іх была ўжытая фізічная сіла, не абышлося і без спецыяльных сродкаў.
«Кіроўцу пагражае адказнасць за кіраванне транспартным сродкам у стане алкагольнага ап'янення, неаднаразовае невыкананне патрабаванняў супрацоўнікаў ДАІ аб спыненні і непадпарадкаванне», — паведамілі ў Міністэрстве.
Да гэтага выпадку кіроўца ўжо тройчы прыцягваўся да крымінальнай адказнасці за нецвярозае кіраванне.
Цяпер чытаюць
Былы палітвязень знайшоў у Вільні падпрацоўку ў чаце — і трапіў пад крыміналку за правакацыі супраць Украіны3
Каментары